სახიფათო ტროტუარი თამარაშვილის ქუჩაზე [ფოტო/ვიდეო]

თამარაშვილის ქუჩის N33 კოპუსთან, რვა ივლისს ტროტუარი გადათხარეს იმ მიზნით, რომ სანიაღვრე არხის გაწმენდითი სამუშაოები დაეწყოთ. ორ კვირაზე მეტია, ანგრეული ტროტუარი, წყლით სავსე ღია სანიაღვრე არხით მთავრდება და გამვლელებს გზის გაგრძელება არ შეუძლიათ.

ტროტუარზე მოსიარულეებს სანიაღვრე არხისთვის გვერდის ავლა უწევთ, რისთვისაც ისინი ბორდიურზე ადიან და შემდეგ სვლას საავტომობილო გზაზე აგრძელებენ.

წყლით სავსე სანიაღვრე არხი, რომელიც ტროტუარს კვეთს, გამვლელებისთვის საფრთხესაც წარმოადგენს.



„ამოთხარეს და დატოვეს ასე. წეღან ქალი მოდიოდა და კინაღამ ჩავარდა. დავუძახე, არ გადახვიდე-მეთქი. მას შემდეგ, რაც ამოთხარეს, თითქმის ყოველ დღე მივდიოდი მერიაში და ვთხოვდი, გაეწმინდათ. სულ ამბობდნენ, ხვალ გავწმენდთო, თანხა არ გვაქვს, არ ჩაურიცხიათო“, - იხსენებს გიორგი მელიქიძე, რომელმაც, მას შემდეგ, რაც სანიაღვრე არხის გაუწმენდაობისა და სტიქიის გამო ფურნე დაეტბორა, საცხობი მეორე სართულზე აიტანა.

ქუჩაზე მცხოვრებლები ამბობენ, რომ სანიაღვრე არხის ბოლო ნაწილის გასაწმენდად, არხის ზედა, გზასთან არსებული ნაწილი, გადაკეტეს და წყალი ამიტომ დაგუბდა: „მთლიანად გასაწმენდია არხი. აქ ჩაკეტეს, რომ წყალი არ გავიდეს ბოლოში და გაწმენდაში ხელი არ შეუშალოს, მაგრამ, გამწმენდები მარტო დღეს გამოჩნდნენ“.

თამარაშვილის ქუჩაზე სანიაღვრე არხის ბოლო ნაწილის გაწმენდა კომპანია „ოცხეს“ წამომადგენლებმა დღეს, 25 ივლისს დაიწყეს. ახალციხის მუნიციპალიტეტის მერიის ინფორმაციით, კომპანია გზების მოვლა-პატრონობაზეა პასუხისმგებელი: „მერიას ტენდერი აქვს ხოლმე გამოცხადებული გზების მოვლა-პატრონობაზე და „ოცხე“ არის კონტრაქტორი კომპანია. ამდენ ხანს ვერ წმენდნენ იმიტომ, რომ სისველე იყო, წყლის ამოშრობას ელოდებოდნენ და როგორც კი ამოშრა, დაიწყეს გასუფთავება“, - აცხადებენ მერიაში.

მათივე განმარტებით, კომპანიის წარმომადგენლები მთლიან არხს გაასუფთავებენ.

თამარაშვილის ქუჩაზე სანიაღვრე არხის გაუწმენდაობისა და მასზე არსებული თვითნებური მიშენებების გამო, ადგილობრივებს ეზოები, ავტოფარეხები და კომერციული ფართი დაუზიანდათ. 28 ივნისისა და ექვსი ივლისის სტიქიის შემდეგ, არხის გაწმენდითი სამუშაოები დაიწყო.

ამავე თემაზე ნახეთ:

რატომ იტბორება ყოველი წვიმის დროს თამარაშვილის ქუჩა

თამარაშვილის ქუჩაზე დატბორილი ეზოები და სანიაღვრე არხი ისევ გასაწმენდია

დატბორილია სარდაფები და ავტოფარეხები – ძლიერი წვიმა ახალციხეში

თამარაშვილის ქუჩაზე სანიაღვრე არხის გაწმენდა დაიწყეს





[თაკო ფეიქრიშვილი, ახალციხე]