ტურისტული ააიპ-ის დირექტორის ვაკანსიაზე შესული შეთავაზებები კომისიას არ აკმაყოფილებს

ტურისტული ააიპ-ის თანამშრომლობის მსურველებს, სამცხე-ჯავახეთის სამხარეო ადმინისტრაციში 17 ივვლისს მოუსმინეს. გასაუბრების დასრულების შემდეგ, კომენტარი შესარჩევი კომისიის თავმჯდომარემ, ეკა ორჯონიკიძემ გააკეთა: „ტურიზმის განვითარებისა და პროექტების მენეჯერის, ასევე მარკეტინგისა და საზოგადოებასთან ურთიერთობის (PR) მენეჯერობის მსურველებით კმაყოფილი ვარ, თუმცა დირექტორის ვაკანსიაზე შემოსული წინადადებებით არ ვარ კმაყოფილი“.

სწორედ ამიტომ, ეკა ორჯონიკიძე ააიპ-ის დირექტორის პოზიციაზე კონკურსის თავიდან გამოცხადებას არ გამორიცხავს: „ამის ერთ-ერთი მიზეზს ანაზღაურებაში ვხედავთ, 1500 ლარი არ არის ის თანხა, რაზეც ჩვენთვის სასურველი კომპეტენციის მსურველი გამოჩნდება. ამიტომ, შესაძლოა, გაზრდილ ხელფასზე, კონკურსი ხელახლა გამოვაცხადოთ“.

გასაუბრებების პირველი ეტაპი სამ ნაწილად წარიმართა, რომელზეც პირველად კომისიის წინაშე ორგანიზაციის აღმასრულებელი დირექტორობის მსურველები წარდგნენ. რვა რეგისტრირებული კონკურსანტიდან, გასაუბრებაზე ექვსი გამოცხადდა.

გასაუბრების მეორე ნაწილი, ტურიზმის განვითარებისა და პროექტების მენეჯერის ვაკანტურ პოზიციაზე დარეგისტრირებული პირებისთვის გაიმართა. აქ 12 რეგისტრირებული აპლიკანტიდან, 8 გამოცხადდა.

ბოლოს კი საკუთარი ხედვა მარკეტინგისა და საზოგადოებასთან ურთიერთობის (PR) მენეჯერობის კანდიდატებმა წარმოადგინეს. ამ პოზიციაზე 7 კანდიდატი იყო რეგისტრირებული და 4 გამოცხადდა.

კონკურსანტების შეფასება ქულებით მოხდება და გასაუბრების შემდეგ ეტაპზე ისინი გადავლენ, ვინც სხვადასხვა კომპეტენციებით 70%–ს გადალახავენ.

სამცხე–ჯავახეთში ტურიზმის განვითარების მიზნით, ტურისტული დანიშნულების ადგილის მართვის ორგანიზაცია (DMO) 2018 წლის ნოემბერში დაფუძნდა. იგი საქართველოს ტურიზმის ეროვნული ადმინისტრაციისა და USAID/Zrda-ს ინიციატივით ჩამოყალიბდა.

[ავთო ინასარიძე, ახალციხე]