ტურისტული ააიპ–სთვის თანამშრომლების შესარჩევ კონკურსზე 47 განაცხადი შევიდა

სამცხე-ჯავახეთში ტურიზმის განვითარებისათვის ჩამოყალიბებული „დანიშნულების ადგილის მართვის ორგანზიაციის“ (DMO) მიერ გამოცხადებულ კონკურსზე 30 ივნისს დასრულდა განაცხადების მიღება. სამ ვაკანსიაზე სულ 30 კონკურსანტის 47 განაცხადი შევიდა – ზოგიერთმა კონკურსანტმა რამდენიმე ვაკანტურ პოზიციაზე შეიტანა განაცხადი.

პარალელურად, კონკურსანტების შესარჩევად, ორგანიზაცია საკონკურსო კომისიას აყალიბებს. მასში სულ ხუთი წევრი შევა და დაემატება კიდევ ორი რეკომენდატორი, საქართველოს ტურიზმის ერონული ადმინისტრაციისა და USAID/Zrda-ს პროექტიდან.

საკონკურსო კომისიის სამი წევრის ვინაობა უკვე ცნობილია. ხუთკაციან შემადგენლობაში არასამთავრობო სექტორიდან ასოციაცია „ტოლერანტის“ ხელმძღვანელი ცირა მესხიშვილი, კერძო სექტორიდან კი, შპს „ლომსიას“ გენერალური დირექტორი ამირან ქიმერიძე შევლენ.

კომისიის თავმჯდომარე იქნება სამცხე–ჯავახეთის სამხარეო ადმინისტრაციაში ადგილობრივი თვითმმართველობის ორგანოებთან ურთიერთობის სამსახურის უფროსი ეკა ორჯონიკიძე. გარადა ამისა, კომისიას დაემატება კიდევ ორი წევრი.

„საკონკურსო კომისიის შექმნამდე, შეიქმნა საბჭო, რომელშიც წევრები ექვსივე დამფინანსებელი მუნიციპალიტეტიდან შედიან. დღეს ამ საბჭოს სხდომა ჩატარდება. მათგან აირჩევა ორი ადამიანი, რომლებიც საკონკურსო კომისიაში შევლენ. სულ ხუთი წევრით დაკომპლექტდება კომისია“, - ამბობს ეკა ორჯონიკიძე.

რაც შეეხება კონკურსანტებს, მათი შერჩევის მეორე ეტაპი 16-17 ივლისს გაიმართება. თითოეულმა კონკურსანტმა, დაახლოებით 15 წუთის განმავლოაბში, კომისიის წინაშე საკუთარი ხედვა უნდა წარმოადგინოს რეგიონის ტურისტული პოტენციალის შესახებ, რაშიც შესაბამის ქულებს მიიღებს.

„ზოგჯერ, CV ძალიან მომხიბვლელია, მაგრამ ადამიანს არ შეუძლია წარმოადგინოს საკუთარი ხედვა. ზოგჯერ კი, CV არის ძალიან მშრალი, თუმცა ადამიანმა იცის თავისი საქმე. ამიტომ გადავწყვიტეთ, რომ კონკურსანტებმა წარმოადგინონ ერთი ტურისტული ლოკაციის განვითარების ან მთლიანად რეგიონის ტურიზმის განვითარების ხედვა. აბსოლუტურად თავისუფლები არიან, რაზე გააკეთებენ აქცენტს“, - ამბობს საკონკურსო კომისიის თავმჯდომარე ეკა ორჯონიკიძე.

წარმოდგენილ პრეზენტაციებს საკონკურსო კომისიის წევრები ქულებით შეაფასებენ. გასაუბრების ეტაპზე გადასასვლელად, კონკურსანტმა ქულათა 70%-ზე მეტი უნდა დააგროვოს.

საბოლოოდ, კომისია 47 განაცხადიდან სამ სპეციალიტსა – ორგანზიციის აღმასრულებელ დირექტორს, ტურიზმის განვითარებისა და პროექტების მენეჯერს და მარკეტინგისა და საზოგადოებასთან ურთიერთობის (PR) მენეჯერს შეარჩევს.

სამცხე–ჯავხეთში ტურიზმის განვითარების მიზნით, ტურისტული დანიშნულების ადგილის მართვის ორგანიზაცია (DMO) 2018 წლის ნოემბერში დაფუძნდა. იგი საქართველოს ტურიზმის ეროვნული ადმინისტრაციისა და USAID/Zrda-ს ინიციატივით ჩამოყალიბდა.

[თაკო ფეიქრიშვილი, ახალციხე]