ტურისტული ააიპ-ის თანამშრომლების შესარჩევად გასაუბრება მიმდინარეობს

„დანიშნულების ადგილის მართვის ორგანიზაციისთვის“ თანამშრომლების შესარჩევად, სამცხე-ჯავახეთის ადმინისტრაციულ შენობაში გასაუბრება დღეს, 17 ივლისს გაიმართა.

გამოცხადებული სამი ვაკანტური ადგილის შესაბამისად, გასაუბრების პროცესიც სამ ნაწილად დაიგეგმა. პირველ ეტაპზე, კომისიის წინაშე, ორგანიზაციის აღმასრულებელი დირექტორობის მსურველები წარსდგნენ.

რვა რეგისტრირებული კონკურსანტიდან, გასაუბრებაზე ექვსი გამოცხადდა. პირველი კომისიის წინაშე 25 წლის გიორგი გელაძე წარსდგა.

„აქ იმიტომ მოვედი, რომ გამოვიყენო ჩემი ცოდნა და გამოვადგე რეგიონს ტურიზმის განვითარებაში. თუ ამიყვანენ, ვიმუშავებ იმაზე, რომ სამთავრობო და ბიზნეს სექტორი ერთმანეთთან დავაკავშირო“, - განმარტა გიორგიმ.

გასაუბრებაზე, კონკურსანტებმა ძირითადი აქცენტი, აგროტურიზმისა და რეგიონში ნაკლებად ცნობადი ტურისტული ობიექტების პოპულარიზაციის მნიშვნელობაზე გააკეთეს.

„ექვსიდან სამი განსაკუთრებით მომეწონა, თუმცა დირექტორის პოზიციისთვის რამდენად არიან შესაფერისი, ძნელი სათქმელია. გვაქვს ქულების სისტემა, სადაც კონკურსანტები სხვადასხვა კომპეტენციებით შეფასდებიან და, 70%–ის გადალახვის შემთხვევაში, შემდგომ ეტაპზე დავიბარებთ", - ამბობს საკონკურსო კომისიის თავმჯდომარე ეკა ორჯონიკიძე.

შესარჩევ კომისიაში, მასთან ერთად, არასამთავრობო და ბიზნეს სექტორებიდან თითო წარმომადგენელი მონაწილეობდა.

გასაუბრების მეორე ნაწილი, ტურიზმის განვითარებისა და პროექტების მენეჯერის ვაკანტურ პოზიციაზე დარეგისტრირებული პირებისთვის გაიმართა. აქ 12 რეგისტრირებული აპლიკანტიდან, მხოლოდ 8 გამოცხადდა.

მესამე ნაწილში საკუთარ ხედვას მარკეტინგისა და საზოგადოებასთან ურთიერთობის (PR) მენეჯერობის კანდიდატები წარმოადგენენ.

გასაუბრების ეტაპი, ადმინისტრაციულ შენობაში 11:00 საათზე დაიწყო და ჯერ არ დასრულებულა [16:30].

სამცხე–ჯავახეთში ტურიზმის განვითარების მიზნით, ტურისტული დანიშნულების ადგილის მართვის ორგანიზაცია (DMO) 2018 წლის ნოემბერში დაფუძნდა. იგი საქართველოს ტურიზმის ეროვნული ადმინისტრაციისა და USAID/Zrda-ს ინიციატივით ჩამოყალიბდა.

[ავთო ინასარიძე, ახალციხე]