ნუგზარ სამარჯიშვილი: ‘ბაღის და სკოლის პედაგოგებს ‘ოცნების’ შეხვედრაზე წასვლას აიძულებენ’

ამის შესახებ „ევროპული საქართველოს“ მაჟორიტარობის კანდიდატმა დღეს, 26 სექტემბერს ჟურნალისტებს განუცხადა.

მისი მტკიცებით, ვალეში სკოლისა და საბავშვო ბაღების ხელმძღვანელებს „ქართული ოცენებიდან“ აქვთ დავალებული, რომ 28 სექტემბერს, ახალციხეში პარტიის კანდიდატების დასახელებაზე, თანამშრომლების მობილიზება მოახდინონ.

„რამდენიმე პედაგოგი მოვიდა ჩემთან და მითხრა, რომ დირექტორმა დაიბარა და განუცხადა, რომ ტრანსპორტი მივა, დანიშნულების ადგილამდე მიიყვანს და შემდეგ უკან წამოიყვანს, მათ კი ამის სურვილი არ აქვთ“,–აცხადებს ნუგზარ სამარჯიშვილი.

მისივე თქმით, პედაგოგები „ქართული ოცნების“ მიერ კანდიდატების წარდგენას თუ არ დაესწრებიან, სამსახურებიდან გათავისუფლებით ემუქრებიან: „მე ჩემი მხრივ ვუთხარი, რომ შეუძლიათ არ წავიდნენ და თუ პრობლემები შეექმნებათ, როგორც ადვოკატი დავეხმარები“.

ნუგზარ სამარჯიშვილი კონკრეტული საბავშო ბაღებისა და სკოლების დასახელებისაგან, ასევე პედაგოგების ვინაობის გამხელისგან თავს იკავებს და ამბობს, რომ მათ ამის პირობა მისცა: „შევპირდი, რომ იდენტიფიცირებას არ მოვახდენდი და შევასრულებ კიდეც. სირცხვილია, როდესაც ხელისუფლება მხოლოდ სახელისუფლებო რესურსზე ამყარებს თავის იმედებს. პირველად ვმონაწილეობ არჩევნებში და იმედი მაქვს, რომ ხალხი საკუთარი სურვილით გააკეთებს არჩევანს“.

ნუგზარ სამარჯიშვიილის მტკიცებას „ქართულ ოცნებაში“ კატეგორიულად უარყოფენ.

„მერობის კანდიდატების შეხვედრაა, ვისაც უნდა მოვა, ვისაც არა, ჩვენ ვერაფერს დავაძალებთ. მსგავს ფაქტებს ადგილი არ ჰქონია და სიცრუეა“, – ამბობს პარტიის ახალციხის შტაბის ხელმძღვანელი გიორგი გვარამაძე „სამხრეთის კარიბჭესთან“.

28 სექტემბერს, „ქართული ოცნება“ ახალციხეში რეგიონის მუნიციპალიტეტების მერობის კანდიდატების წარდგენას გეგმავს. რომელ საათზე გაიმართება შეხვედრა, ამ ეტაპზე უცნობია.

[ლუბა გიორგაძე, ახალციხე]