რწმუნებულის ადმინისტრაციაში 2020 წლის ინფრასტრუქტურულ ბიუჯეტზე იმსჯელეს

მინისტრის მოადგილემ სამინისტროს მიერ სახელმწიფო ბიუჯეტით დასაფინანსებელი პროექტები წარადგინა. 2019 წელს 9 სხვადასხვა პროგრამიდან (მათ შორის რეგიონული ფონდი, სოფლის პროგრამა, სკოლების მშენებლობა და სხვა) მუნიციპალიტეტებისთვის 420 მილიონი ლარია გამოყოფილი, 2020 წლისთვის 110 მილიონით მეტი, ანუ 530 მილიონი ლარია გათვალისწინებული.

მინისტრის მოადგილის, ილია ბეგიაშვილის თქმით, შეხვედრა მერიებს 2020 წელს ინფრასტრუქტურული პროექტების განხორციელებაში დაეხმარება: „შეხვედრებზე, როგორც დაგეგმვის პროცესზე, ასევე პროექტების მოცულობების განსაზღვრაზე ვსაუბრობთ. ყველაზე მნიშვნელოვანი არის არა მუნიციპალიტეტებისთვის ცენტრალური ბიუჯეტიდან თანხების გამოყოფა, არამედ ლიმიტებზე მუშაობა, ანუ ზუსტად რა რესურსები დაჭირდება ამა თუ იმ მუნიციპალიტეტს 2020 წელში განსახორციელებელ პროექტებზე”.

„მნიშვნელოვანია, რომ უკვე ვიცით, რა უნდა გავაკეთოთ 2020 წელს, ძალიან მნიშვნელოვანია, რომ წინასწარ ვიცით რა თანხებზე უნდა ავიღოთ ორიენტაცია; შესაბამისად უკეთ მოვემზადებით და შევიძენთ პროექტებს“, - გვითხრა შეხვედრიდან გამოსულმა ახალციხის მერმა ზაზა მელიქიძემ.
2020 წელს განსახორციელებელი პროექტების ბიუჯეტზე შეხვედრა მერებთან, სამცხე-ჯავახეთამდე, ქვეყნის ოთხ რეგიონში უკვე გაიმართა.

დღევანდელ შეხვედრას, მხარის რწმუნებულთან, ბესიკ ამირანაშვილთან და მერებთან ერთად, ესწრებოდნენ რეგიონის მაჟორიტარი დეპუტატები ენზელ მკოიანი და გია კოპაძე.



[ავთო ინასარიძე, ახალციხე]