ინფრასტრუქტურული პროექტების განსახორციელებლად რეგიონებს წელს 230 მილიონი ლარი გამოეყო

საქართველოს რეგიონული განვითარებისა და ინფრასტრუქტურის მინისტრის მოადგილე შოთა მურღულია დღეს მუნიციპალიტეტების ხელმძღვანელებს შეხვდა და რეგიონებში განსახორციელებელი პროექტების ფონდიდან დაფინანსებული პროექტების მიმდინარეობა და მომდევნო წლის გეგმები მათთან ერთად განიხილა.

„ჩვენ განვიხილეთ ის, თუ რომელი პროექტების დასრულება ესწრება წელს და რომლისა - ვერა. ძირითადად, დაგეგმილი სამუშაოები ესწრება, ტემპი კარგია, თუმცა, რიგი ობიექტური მიზეზების გამო, პროექტების ნაწილის დასრულება მომავალი წლის დასაწყისისთვის გადაიწევს,“ - განაცხადა შოთა მურღულიამ.

ამავე შეხვედრაზე მომავალი წლის პროგრამებიც განიხილეს.

"გვინდა, წელსვე გავიაროთ ყველა მნიშვნელოვანი საკითხი, რომ დრო არ დავკარგოთ. პროექტირებისა და ტენდერებისთვის მომავალი წლის ზამთარს გამოვიყენებთ, რათა 2014 წლის ინფრასტრუქტურული პროექტების განხორციელება ადრე დავიწყოთ. გაისად სამუშაო ამ მიმართულებით იმაზე მეტი იქნება, ვიდრე წელს იყო",- განაცხადა მურღულიამ.

წელს რეგიონებში განსახორციელებელი პროექტების ფონდიდან საქართველოს მასშტაბით 695 ინფრასტრუქტურული პროექტი დაფინანსდა.

[sknews.ge]