არალის ხიდის ბედი კვლავ გაურკვეველია

ადიგენი-უდე - არალის საავტომობილო გზაზე, მდინარე ოცხეზე, გადასასველი ხიდის მშენებლობა 2018 წლის დეკემბერში შეჩერდა. გზების დეპარტამენტი და მოსახლეობა კომპენასაციების გაცემის ოდენობაზე ვერ თანხმდებიან.

„სანამ მიწას არ გამოისყიდის, დეპატრტამენტი ვერ აგრძელებს სამუშაოებს. არც მოსახლეობა აძლევს საშუალებას, რომ გააგრძელოს მუშაობა. ვიღაცებს მოველაპარაკეთ, ვიღაცებს ვერა. დეპარტამენტი მაქსიმალურად ცდილობს, რომ ექსპროპრიაციამდე არ მივიდეს საქმე და შესაბამის თანხებზე მოილაპარაკონ“, - განმარტავენ საავტომობილო გზების დეპარტამენტში.

მათივე თქმით, თუ მოლაპარაკება ვერ შედგება, პროცედურულად, საქმე სასამართლომდე მივა და დადგება მიწის ექსპროპრიაციის საკითხი, რაც სახელმწიფოს მიერ საკუთრების ძალადობრივ ჩამორთმევას გულისხმობს, ანაზღაურებით ან მის გარეშე: „სასამართლოში წავა პროცესი და ის გადაწყვეტს, დარჩება მოქალაქეს თუ სახელმწიფო საკუთრებაში გადავა მიწა. ამ ყველაფერს, ზოგჯერ ბევრად მეტი დრო სჭირდება, ვიდრე ორი, სამი თვეა“.

იმ მიწის ნაკვეთების მეპატრონეები, რომელთა ტერიტორიის შესყიდვასაც სახელმწიფო აპირებს, ამბობენ, რომ დეპარტამენტი მათი მიწების სანაცვლოდ, მინიმალურ თანხას იხდის - ერთ მეტრში 3.50 ლარს.

„ერთ კვადრატულ მეტრში ერთი „პაჩკა“ სიგარეტის ფულს არ მაძლევენ. კვადრატულ მეტრში სამი ლარი და 30 თეთრიო. მე მაგ მიწას საერთოდ ვკარგავ, არადა მამა–პაპისეული მიწაა, მამაჩემისგან ერთი ეგ დამრჩა. ნორმალური ანაზღაურება ხომ უნდა ყოფილიყო?! ამიტომ მაგ თანხაზე უარს ვამბობ“, – აცხადებს მიწის ფართობის ერთ–ერთი მესაკუთრე.

ადიგენი–უდე–არლის საავტომობილო გზაზე, მდინარე ოცხეზე ხიდს საავტომობილო გზების დეპარტამენტი აშენებს. ხიდის მშენებლობა 2018 წლის დეკემბერში უნდა დასრულებულიყო, თუმცა ამავე თვიდან სამუშაოები შეჩერებულია. მშენებლობა ტენდერში გამარჯვებულმა კომპანიამ "ჯორჯიან ბრიჯ ქონთრაქშენმა" განახორციელა. სამუშაოებისათვის 1 737 131 ლარია გათვალისწინებული.

[თაკო ფეიქრიშვილი, ადიგენი]