პოლონელი სპეციალისტები შშმ პირთა საჭიროებების საკითხებზე ტრენინგებს ატარებენ

პოლონელი სპეციალისტები „ტალითა კუმი“-ს სარეაბილიტაციო ცენტრში ტრენინგს სამცხე-ჯავახეთში მცხოვრებ შშმ პირთა ოჯახის წევრებისთვის ატარებენ.

„ვცდილიბთ მივაღწიოთ იმას, რომ შშმ პირი განიხილებოდეს, როგორც საზოგადოების სრულფასოვანი წევრი“,– ამბობს პოლონეთიდან მოწვეული სპეციალისტი, ფსიქო თერაპევტი, ტრენერი და სოციო თერაპევტი კამილა მაჩიეევსკა.

შეხვედრაზე ასევე ისაუბრეს იმ პრობლემებზე, რომლებთან გამკლავება შშმ პირთა ოჯახის წევრებს უწევთ.

„შეზღუდული შესაძლებლობა ხშირად განიხილება მხოლოდ ნეგატიური კუთხით. გვსურდა ეს საკითხი მშობლებისთვის პოზოტიური კუთხითაც გვეჩვენებინა“, – ამბობს კამილა მაჩიეევსკა.

დღევანდელი შეხვედრა პროექტის „ბედნიერები ერთად“ ფარგლებში ჩატარდა, რომელსაც ავადმყოფთა სასულიერო პირთა ორდენის კამილიელების ფილიალი საქართველოში, პოლონეთის ქ. ოპოლეში მოღვაწე ფონდი „საოჯახო დახმარების სახლი, ცერებრული დამბლის მქონე ბავშვთა რეაბილიტაცია“ და პოლონეთის საგარეო საქმეთა სამინისტრო ერთობლივად ახორციელებს.

მსგავსი სახის შეხვედრების პირველი ნაწილი უკვე გაიმართა არასამთავრობო და სამთავრობო სექტორის წარმომადგენელთათვის.

მიმდინარე პროექტი არის წინა პროექტის გაგრძელება, რომელიც 2015 წელს განხორციელდა, რომლის შედეგად თბილისსა და ახალციხეში ჩამოყალიბდა მშობელთა მხარდამჭერი ჯგუფები, ასევე ილიას სახელმწიფო უნივერსიტეტში საერთაშორისო კონფერენცია ჩატარდა.



[მარიამ ბარძიმაძე, ახალციხე]