ქალთა სკოლა ახალციხეში

ანა ღოღობერიძე– მუსხელიშვილი დაიბადა 1842 წელს, ქალაქ ქუთაისში. პროფესიით პედაგოგი გახლდათ.

1870 წელს მან „ახალციხის საქველმოქმედო საზოგადოება"დააფუძნა, რომლის მიზანსაც ახალციხეში ქართველი ქალებისთვის უფასო სასწავლებლის გახსნა, ასევე, მათთვის ხელსაქმის სწავლება წარმოადგენდა. თავდაპირველად პედაგოგიურ საქმიანობას თავადაც ეწეოდა.

1874 წელს, ახალციხის ქალთა უფასო სკოლის დაარსებას, სადაც, ძირითადად, შეჭირვებულები სწავლობდნენ, იაკობ გოგებაშვილმა „ცისკრის ამოსვლა“ უწოდა.

1875 წელს დროებით ქუთაისში გადასახლდა და იქაც ენერგიულად განაგრძობდა საზოგადოებრივ საქმიანობას, განსაკუთრებით აღსანიშნავია მისი ზრუნვა ღარიბ მოსწავლეთა ეკონომიკური პირობების გასაუმჯობესებლად.

1885 წელს ანა ღოღობერიძე–მუსხელიშვილი ისევ დაბრუნდა ახალციხეში საცხოვრებლად და გარდაცვალებამდე (1890 წ.) ზრუნავდა მის მიერ დაარსებულ სკოლაზე; მონაწილეობდა წერა-კითხვის გამავრცელებელი საზოგადოების „ახალციხის განყოფილების“ დაარსებაში. იყო ცნობილი საზოგადო მოღვაწის, ნიკოლოზ ღოღობერიძის და, ახალციხის მაზრის სამხედრო უწყების მოხელე-გენერლის, გ. მუსხელიშვილის მეუღლე.

წყარო – საქართველოს პარლამენტის ეროვნული ბიბლიოთეკა.

[გულო კოხოძე, ახალციხე]