ვარძია–გოგაშენის გზაზე მეწყერი განმეორდა, ადგილზე გეოლოგებს ელოდებიან

როგორც „სამხრეთის კარიბჭესთან“ მხარის რწმუნებულის მოადგილე შალვა ბერძენიშვილი აცხადებს, მეწყერის ჩამოწოლა, სავარაუდოდ, გუშინ, 12 ივნისს მომხდარმა მიწისძვრამ გამოიწვია.

„კლდის მასა, გზის ზუსტად იმ მონაკვეთზეა ჩამოშლილი, სადაც პირველად იყო მეწყერი. აქ კლდის ზედა ფენა გაწმენდის პროცესში მოშალეს, თუმცა დარჩენილი ნაწილი მიწისძვრის შემდეგ ჩამოვიდა. კლდის მასა იმაზე ბევრად მეტია, ვიდრე პირველი შემთხვევისას იყო“, – ამბობს შალვა ბერძენიშვილი.

ვარძია–გოგაშენის გზაზე, პირველად ჩამოწოლილი მეწყერის შემდეგ გზის გაწმენდითი სამუშაოებს სამშენებლო კომპანია „ასტორია“ ახორციელებდა, იმის გამო, რომ მეწყერი ღამის საათებში განმეორდა, აქ მომუშავე ტექნიკა კლდის მასაში მოყოლას გადაურჩა.

კომპანიას ვარძია–გოგაშენის დამეწყრილი გზის გაწმენდითი სამუშაოები ორ დღეში უნდა დაესრულებინა.

შალვა ბერძენიშვილის თქმით, ამ დროისათვის ადგილზე თბილისიდან გეოლოგების ჯგუფს ელოდებიან, რომლებიც მეწყერის გამომწვევ მიზეზებს შეისწავლიან: „გელოლოგების რეკომენდაციის შემდეგ, ჩვენ იგივენაირად შევაგროვებთ ყველა დოკუმენტს, როგორც პირველის შემთხვევაში იყო, და სამინისტროს დაფინანსებას ვთხოთ“.

ვარძია–გოგაშენის გზაზე, მეწყერი პირველად ერთი თვის წინ, 13 მაისს ჩამოწვა, რომელიც გეოლოგებმა შეისწავლეს. მათი რეკომენდაციით გზის აღდგენა შესაძლებელი იყო, თუმცა მეწყერული პროცესების განმეორებას ისევ ვვარაუდობდნენ. აქ სამუშაოები სწორედ გეოლოგების რეკომენდაციით დაიწყო.



[ლუბა გიორგაძე, ახალქალაქი]