ვარძია–გოგაშენის დამეწყრილი გზის გაწმენდა დაიწყო

ვარძია–გოგაშენის დამეწყრილ გზაზე გაწმენდით სამუშაოებს სამშენებლო კომპანია „ასტორია“ ახორციელებს. კომპანიას გზის გასაწმენდად 20–დღიანი ვადა აქვს.

სამცხე–ჯავახეთის სამხარეო ადმინისტრაციაში აცხადებენ, რომ კომპანია სამუშაოებს გეოლოგების რეკომენდაციების მიხედვით ახორციელებს, რადგან აქ, სამუშაოების პროცესში კლდის მასის ჩამოწოლის საშიშროება არსებობს.

„აქ მძიმე ტექნიკა მუშაობს, ამიტომ გეოლოგების დასკვინის მიხედვით, პირველ ეტაპზე, გზის ნაპირზე კლდის ზედაფენები იწმინდება, მოიხსნა დიდი ლოდები და დაიშალა, რომელიც შესაძლოა გზაზე ჩამოსულიყო და მუშებისთვის საფრთხე შეექმნა“, – ამბობს მხარის რწმუნებულის მოადგილე შალვა ბერძენიშვილი.

გზა ამ დრომდე გადაკეტილია და, ბერძენიშვილის თქმით, ამკრძალავი ნიშნებია განთავსებული. გზის გაწმენდითი სამუშაოები ფინანსთა სამინისტროს დაფინანსებით მიმდინარეობს. უწყებამ ამისთვის 150 000 ლარი გამოყო.

ვარძია–გოგაშენის გზაზე მეწყერი 13 მაისს ღამე ჩამოწვა. კლდის მასამ გზის 45 მეტრიანი მონაკვეთი დაფარა; არავინ დაშავებულმა.

გზის დამეწყრილი ტერიტორია გეოლოგებმა 18 მაისს შეისწავლეს და დასკვნაც გამოაქვეყნეს, რომლის მიხედვითაც გზა აღდგენას ექვემდებარება, თუმცა, მეწყერული პროცესების თავიდან ასაცილებლად, აუცილებელია საყრდენი კედლების მოწყობა.

სამხარეო ადმინისტრაციაში ამბობენ, რომ გზის გაწმენდითი სამუშაოების დასრულების შემდეგ, გზის მიმდებარე ტერიტორია დაპროექტდება და საყრდენი კედლები მოეწყობა.

[ლუბა გიორგაძე, ახალქალაქი]