ასპინძაში შვიდი სული პირუტყვი მოიპარეს

მოპარული საქონლიდან ექვსი ზველის მცხოვრებს, ერთი კი იდუმალის მკვიდრის ეკუთვნის.

ზველში მცხოვრები გენადი დიასამნიძე ამბობს, რომ ექვსი სული პირუტყვი ბოლო ორი თვის განმავლობაში მოპარეს: "ბიჭებმა დაინახეს მანქანაზე როგორ აჰყავდათ ჩემი საქონელი.ბოლოს, ერთი კვირის წინ კი ძროხა წაიყვანეს“,–ამბობს გენადი დიასამნიძე და ამატებს, რომ ჯამში 13 000 ლარის ზარალი ნახა.

იდუმალაში მცხოვრებ ირინა მჭედლიშვილს, ღობიეთის საძოვრებიდან ძროხა ორი დღის წინ მოპარეს: „დილით საძოვარზე გავუშვით, შუადღის მერე კი ერთ–ერთმა მწყემსმა დამირეკა შენი საქონელი მოიპარესო, დაუნახავს როგორ შეუსვიათ მანქანაზე და წაუყვანიათ“.

ირინა ამბობს, რომ მისი ინფორმაციით, საქონლის ქურდობისთვის ერთი პირი დააკავეს: „დააკავეს, მაგრამ პირუტყვი ვეღარ დამიბრუნეს, უკვე დაკლული ყოფილა“.

შინაგან საქმეთა სამინისტროში აცხადებენ, რომ მომხდარის შესახებ იციან და ინფორმაციას ხვალ, ოთხ ივნისს გაავრცელებენ.

[ლუბა გიორგაძე, ასპინძა]