თურქეთში ახალქალაქიდან მოპარული 19 სული საქონელი ნახეს

ამის შესახებ „სამხრეთის კარიბჭეს“ შინაგან საქმეთა სამინისტროში განუცხადეს. უწყების ინფორმაციით, მას შემდეგ, რაც ახალქალაქში საქონლის მოპარვის შესახებ პოლიციამ შეიტყო, მათ თურქეთის ძალოვან უწყებებთან კომუნიკაცია დაამყარეს: „თურქეთის პოლიციამ 19 სული საქონელი თურქეთის ტერიტორიაზე ნახა, თუმცა, ჯერ პირუტყვი გადმოყვანილი არაა. გამოძიება ისევ გრძელდება“.

შინაგან საქმეთა სამინისტროში აცხადებენ, რომ დაზარალებულების ჩვენებების საფუძველზე, საერთო ჯამში, ახალქალაქის მუნიციპალიტეტიდან მოპარული 65 სული საქონელი აღმოჩნდა.

შეგახსენებთ, რომ 27 მაისს, თურქეთის საზღვართან მდებარე საძოვრებიდან მწყემსებს საქონელი მოპარეს. ისინი ამბობენ, რომ მათთან სამი–ოთხი შეიარაღებული პირი მივიდა, მწყემსებს ხელ–ფეხი შეუკრეს და ამის შემდეგ საქონელი წაიყვანეს. მათი თქმით, ყაჩაღები თურქულად საუბრობდნენ.

მომხდარის შემდეგ, 28 მაისს საზღვარზე კონტროლის გაძლიერების მოთხოვნით ადგილობრივებმა საპროტესტო აქცია გამართეს და თურქეთის საზღვრის მიმდებარე ტერიტორიაზე გზა გადაკეტეს.

სოფელ სულდასთან მომხდარ ფაქტზე, შინაგან საქმეთა სამინისტრომ გამოძიება სისხლის სამართლის კოდექსის 179-ე მუხლის მე-2 ნაწილის ბ ქვეპუნქტით დაიწყო, რაც ჯგუფურად ყაჩაღობის ჩადენას გულისხმობს.

[თამუნა უჩიძე, ახალქალაქი]