საქონლის ქურდობაში ბრალდებულებს სასამართლომ გირაო შეუფარდა

ახალციხის რაიონულმა სასამართლომ აღკვეთის ღონისძიების შეფარდებაზე დღეს, ოთხ ივნისს იმსჯელა.სამივე დაკავებული ბრალს აღიარებს.

სასამართლო სხდომაზე, დაცვის მხარემ, დაკავებულების გირაოს სანაცვლოდ დარბაზშივე გათავისუფლებაზე, ბრალდების მხარემ კი აღკვეთის ღონისძიებად პატიმრობის შეფარდების შუამდგომლობა დააყენა.

„მოსამათლემ ორივე მხარის შუამდგომლობა ნაწილობრივ დააკმაყოფილა, დაკავებულებს გირაო შეუფარდა თუმცა, ვიდრე არ გადაიხდიან პატიმრობაში დარჩებიან“,–ამბობს ადვოკატი ირაკლი ბარძიმაძე.

ახალციხესა და ასპინძაში საქონლის ქურდობისათვის დაკავებული ახალგაზრდები ახალციხის მუნიციპალიტეტში ცხოვრობენ.

გამოძიება სისხლის სამართლის კოდექსის 177-ე მუხლის მე-2 ნაწილის "ა" ქვეპუნქტით, ქურდობის ფაქტზე მიმდინარეობს, რამაც მნიშვნელოვანი ზიანი გამოიწვია და 3–იდან 5 წლამდე ვადით თავისუფლების აღკვეთას ითვალისწინებს.

შსს–ში ამბობენ, რომ ბრალდებულები 19–20 წლისები არიან. მათ ასპინძისა და ახალციხის მუნიციპალიტეტებში, სხვადასხვა დროს, ადგილობრივებს მსხვილფეხა პირუტყვი მოჰპარეს.

ბოლო შემთხვევა გასულ კვირას ასპინძაში მოხდა. ბოლო ორ თვეში ღობიეთის საძოვრებიდან შვიდი სული პირუტყვი მოიპარეს.სამართალდამცველებმა ახალგაზრდები იმ დროს დააკავეს, როდესაც ისინი ნაქურდალი საქონლის რეალიზაციას ცდილობდნენ.

[ლუბა გიორგაძე, ახალციხე]