გიორგი მარგველაშვილი ბორჯომელებს შეხვდა [Video]

კურორტის ცენტრში პრეზიდენტის დასახვედრად შეკრებილ ადგილობრივებს გიორგი მარგველაშვილმა გასული საპარლამენტო არჩევნები გაახსენა და მხარდაჭერისკენ მოუწოდა. პრეზიდენტობის კანდიდატმა ადგილობრივებს უფასო მომსახურებებიც შეახსენა.

„ერთი საფიქრალი აქვს თანამდროვე ქართულ მთავრობას, როგორმე ნელ-ნელა მისცეს შესაძლებლობა ქართულ ოჯახს, რომ წელში გაიმართოს. ეს იწყება იმით, რომ დაიწყო უფასო მშობიარობის პროგრამა და უკვე 6000 ოჯახში გაჩნდა ბავშვი. ასევე ოჯახის მომსახურების ნაწილია, როდესაც საბავშვო ბაღები გახდება უფასო. ამავე ოჯახებისთვის არის კარგი, რომ მათ შვილებს 16 სექტემბერს უფასო წიგნები დახვდებათ, იმიტომ რომ იმ ფულს, რასაც აქამდე წიგნების ყიდვაში ხარჯავდნენ, თავიანთ შვილებს და ოჯახებს მოახმარენ“, - განაცხადა მარგველაშვილმა.



„გამარჯვების ბოლომდე მისაყვანად დაგვრჩა რამდენიმე თვე. 27 ოქტომბერი ჩვენი ქვეყნისთვის არის პრინციპულად მნიშვნელოვანი, იმისათვის რომ საბოლოოდ გავიმარჯვოთ იმ რეჟიმზე, რომელმაც ბოლო 9 წლის განმავლობაში ძალიან ცუდ მდგომარეობაში ჩააყენა ჩვენი ქვეყნის მოსახლოება“, - მიმართა ბორჯომელებს ენერგეტიკის მინისტრმა კახი კალაძემ.

27 ოტომბრისთვის მხარდაჭერა სთხოვა ბორჯომელებს ფინანსთა მინისტრმა ნოდარ ხადურმაც.



საპრეზიდენტო კანდიდატს ბორჯომის ცენტრში მუნიციპალიტეტის რამდენიმე სოფლის მოსახლეობა შეხვდა.

„ჭობისხევში ვცხოვრობთ, „მარშუტკებმა“ უფასოდ ჩამოგვიყვანეს და აქედანაც წაყვანას დაგვპირდნენ“,-ამბობს სოფელ ჭობისხევში მცხოვრები ლია ქოზაშვილი.

ცენტრალური მოედანთან, სადაც ადგილობრივები პრეზიდენტობის კანდიდატს ხვდებოდნენ, მუნიციპალიტეტიდან ჩამოსულ მოსახლოებას მიკროავტობუსები ნამდვილად ელოდნენ. კითხვაზე, ვის მიერ იყვნენ დაქირავებული და რატომ არ ახდევინებდნენ მგზავრებს მგზავრობის ღირებულებას, მძღოლების ნაწილი პასუხისგან თავს იკავებდა. ნაწილი კი ამბობდა, რომ მათ თავიანთი სურვილით და საწვავით გადაწყვიტეს მოსახლეობის ჩამოყვანა.

„ჩემი ნებით წამოვიყვანე მოსახლეობა. გზის ფული არავის მოუცია, ალბათ თვითონ მგზავრები გადაიხდიან“, - გვითხრა მიკროავტობუსის მძღოლმა კობა გელაშვილმა.

ბორჯომის ცენტრიდან პრეზიდენტობის კანდიდატმა ცენტრალურ პარკში გადაინაცვლა. ადგილობრივები მარგველაშვილს პირად პრობლემებზე ესაუბრნენ.

„ცენტრალური პარკის შესასვლელში, 9 აპრილის ქუჩაზე, #44-ში ვცხოვრობთ 6 ოჯახი, შენობას სახურავი და კედლები დაზიანებული აქვს და წყალი ჩამოგვდის. ყველა შენობა გაკეთდა ბორჯომში და ჩვენ ყურადღებას არავინ გვაქვცევს. ვთხოვეთ, რომ დაგვეხმაროს და გაგვირემონტოს“, - ამბობს 9 აპრილის ქუჩის მცხოვრები ნანა ხაჩიძე.

კოალიცია „ქართული ოცნების“ საპრეზიდენტო კანდიდატის გიორგი მარგველაშვილი წინასაარჩევნო კამპანიის ფარგლებში სამცხე-ჯავახეთის რეგიონში დღეს პირველად იყო.



[თინათინ ზაზაძე,ბორჯომი]