დღის კითხვა: რამდენად გაუმართლა მოლოდინი ბორჯომელებს ხელისუფლების შეცვლამ [Video]

მთავარი → დღის კითხვა, ვიდეო 18.03.2015

რას ელოდებოდნენ და რამდენად გაუმართლდათ მოლოდინები ხელისუფლების შეცვლის შემდეგ ბორჯომში მცხოვრებლებს –"სამხრეთის კარიბჭემ" ბორჯომის ქუჩებში მოქალაქეები გამოკითხა.

სამცხე–ჯავახეთის შვიდი მუნიციპალიტეტიდან ბორჯომი ერთადერთია, სადაც მმართველი გუნდი არჩევნებს ყოველთვის ვერ იგებდა, ან დიდი უპირატესობით ვერ იმარჯვებდა.

2012 წლის საპარლამენტო არჩევნებზე, მაშინ როდესაც საქართველოში ხელისუფლება შეიცვალა, ბორჯომი ერთადერთი მუნიციპალიტეტი იყო, სადაც მაშინდელმა ხელისუფლებამ არჩევნები წააგო. 2012 წლის არჩევნებზე ასპარეზზე ახლად გამოჩენილმა ოპოზიციურმა ძალამ "ქართულმა ოცნებამ" არჩევნებზე მისული მოქალაქეების ხმების 63% მიიღო. 2013 წლის საპრეზიდენტო არჩევნებზე, ჯერ ისევ ახალბედა ძალის, "ქართული ოცნების" საპრეზიდენტო კანდიდატმა გიორგი მარგველაშვილმა, ხმების 67% მიიღო. 58%–ით გაიმარჯვა "ქართული ოცნების" გამგებლობის კანდიდატმა 2014 წლის ადგილობრივი თვითმმართველობის არჩევნებში.

"სამხრეთის კარიბჭე" დაინტერესდა, რა მოლოდინი ჰქონდათ ამომრჩევლებს ბორჯომში ახალი ხელისუფლებისგან და რამდენად გამართლდა მათი მოლოდინი.

გამოკითხულთა უმეტესობა ამბობს, რომ ხელისუფლებამ არაფერი შეასრულა იქიდან, რასაც წინასაარჩევნოდ ჰპირდებოდა. ნაწილი ამბობს, რომ მათი მოლოდინი ნაწილობრივ გამართლდა, გაცილებით ობიექტურია სასამართლო და სიტყვის თავისუფლებაა.

[თამუნა უჩიძე, ოთარ აწყურელი, ბორჯომი]