ჭელის მეჩეთის წინამძღვარი:'გამოვიყენებთ ყველა ღონეს, რათა საერთაშორისო საზოგადოება ჩავაყენოთ საქმის კურსში'

"მიზანმიმართულად ეწევიან მუსლიმების დისკრიმინაციას. პრემიერმა იგივე გაიმეორა, რაც თქვა წულუკიანმა. ამბობენ, ერთ ღამეში დადგეს მინარეთიო, ასე არ არის, ეს ძაბავს ვითარებას და არ მოიტანს კარგ შედეგს. რამდენჯერ ვთქვათ, რომ მეჩეთი ჩუმად არ დადგმულა?! ვიღაცას ან შეგნებულად შეჰყავს შეცდომაში პრემიერი, ან მას საერთოდ არ აქვს ინფორმაცია", - აცხადებს ჯამბულ აბულაძე.

მისივე თქმით, ჭელაში მცხოვრებლები ელოდებიან, რომ მინარეთი თავის ადგილს დაუბრუნდება. რადგან, მათი დაკვირვებით, ხელისუფლება ამ ნების გამოჩენას არ აპირებს, მუსლიმური თემი იძულებული გახდება სხვა გზას მიმართოს.

"ჩვენ გამოვიყენებთ ყველა ღონეს, რათა საერთაშორისო საზოგადოება ჩავაყენოთ საქმის კურსში. ვიბრძოლებთ მშვიდობიანად, სამართლებრივად, როგორც ისლამი გვასწავლის", - აცხადენე ჭელის მეჩეთის წინამძღვარი.

შეგახსენებთ, 26 აგვისტოს შემოსავლების სამსახურმა ჭელის მეჩეთის მინარეთის დემონტაჟი განახორციელა, რასაც მუსლიმური თემის პროტესტი მოჰყვა. 30 აგვისტოს მინარეთი მეჩეთიდან რამდენიმე კილომეტრის მოშორებით დაასაწყობეს და დალუქეს, იმ დრომდე, ვიდრე ამ კუთხით კანონმდებლობა არ მოწესრიგდება. ჭელის მინარეთის საკითხს მთავრობის არაერთი წევრი გამოეხმაურა. პრემიერ-მინისტრმა განაცხადა, რომ მინარეთი კანონდარღვევით აშენდა და უკანონობაზე ხელისუფლება თვალს ვერ დახუჭავს. მან უარყო დემონტაჟის რელიგიური საფუძველიც: „როგორც მთავრობის მეთაური აქცენტს გავაკეთებ კანონზე. არ შეიძლება ისე მოვიქცეთ, რომ ერთ ღამეში, დილით გავიღვიძოთ და მინარეთი დგას, რომელიც არავისთან შეთანხმებული არ არის, პროექტი არ არსებობს , ადგილობრივი თვითმმართველობა საქმის კურსში არ არის", - განაცხადა პრემიერმა გუშინ, 4 სექტემბერს, ჟურნალისტებთან საუბრისას.

[sknews.ge]