ბიძინა ივანიშვილის თქმით, ჭელაში მინარეთი კანონდარღვევით აშენდა

„ჩვენი ისტორიის განმავლობაში რელიგიური შეუწყნარებლობის მაგალითი არ მოიძებნება. ღრმად მწამს,რომ ეს ტრადიცია არსად გამქრალა და ჩვენი ხალხისთვის სრულიად ბუნებრივია მშვიდობიანი თანაცხოვრება, რელიგიური შემწყნარებლობა, რელიგიური გრძნობების პატივისცემა. ეს არამხოლოდ ჩვენი ეროვნული ტრადიციაა, არამედ საქართველოს კონსტიტუციის ერთ-ერთი ფუნდამენტური ღირებულება. სწორედ ეს მაფიქრებინებს, რომ სოფელ ჭელაში მომხდარ ინცინდენტს არაფერი აქვს საერთო რელიგიურ შეუწყნარებლობასთან. მინარეთის აშენება კანონდარღვევით მოხდა. თვითნებობასა და უკანონობაზე კი ხელისუფლება თვალს ვერ დახუჭავს“,- განაცხადა ბიძინა ივანიშვილმა.

პრემიერის თქმით ჭელაში მომხდარ ინცინდენტს შეისწავლიან და შესაბამისი რეაგირება მოჰყვება.

„თუ სოფელ ჭელაში მინარეთის დემონტაჟის პროცესის დროს აქციის მონაწილეების მიმართ დაირღვა კანონი, ან გამოყენებული იყო გადამეტებული ძალა, ეს იქნება შესწავლილი, რასაც მოჰყება შესაბამისი რეაგირება“,- განაცხადა ივანიშვილმა.

პრემიერის თქმით, ნებისმიერი აღმსარებლობის მქონე ადამიანისთვის ქვეყანაში რელიგიათაშორის თანხმობას და მშვიდობას ალტერნატივა არ აქვს.

„ამ პროცესში უაღრესად მნიშვნელოვანია რომ კანონმა და სასამართლომ აღადგინოს კანონიერება. როდესაც საქმე რელიგიურ გრძნობებს ეხება, ხელისუფლებას მეტი სიფრთხილე გვმართებს, რადგან ეს მეტად სათუთი თემაა“, - განაცხადა პრემიერმა.

შეგახსენებთ, 26 აგვისტოს, ადიგენის მუნიციპალიტეტის სოფელ ჭელაში შემოსავლების სამსახურმა მინარეთის დემონტაჟი განახორციელა. იმავე დღეს, წინააღმდეგობის გაწევის გამო პოლიციამ ჭელაში რამდენიმე ადგილობრივი დააკავა. მომხდარს მუსლიმური თემის წარმომადგენელთა პროტესტი მოჰყვა.

მინარეთის დემონტაჟის დროს დაკავებულთა სასამართლო პროცესები აქციის პარალელურად მიმდინარეობდა. იმ 6 დაკავებულის სასამართლო, რომელთა მიმართაც საქმის წარმოება ადმინისტრაციული წესით მიმდინარეობდა, 27 აგვისტოს ორ ეტაპად წარიმართა. 6-ვე მათგანს სასამართლომ 400-ლარიანი ჯარიმა დააკისრა. 3 დაკავებულს კი ბრალი სისხლის სამართლის კოდექსის 353-ე მუხლის მეორე ნაწილით წარუდგინეს, რაც 4-დან 7 წლამდე პატიმრობას ითვალისწინებს. ამავე დღეს, საღამოს, რაინდი შანთაძეს, ვახტანგ მარკოიძეს და გენადი აბაშიძეს ახალციხის რაიონულმა სასამართლომ 2 000-ლარიანი გირაო შეუფარდა. მათ აღნიშნული თანხის გადასახდელად 30 კალენდარული დღის ვადა მისცეს. შემდეგი პროცესი 2013 წლის 16 ოქტომბერს ჩაინიშნა.

[sknews.ge]