ახალციხის საკრებულო და სამხარეო ადმინისტრაცია ყველაზე ანგარიშვალდებულ უწყებებად დასახელდა

ინფორმაციის თავისუფლების განვითარების ინსტიტუტის გამოქვეყნებულ ანგარიშში ვკითხულობთ, რომ ქვეყნის მასშტაბით არსებული ცხრა ადმინისტრაციიდან, სამცხე–ჯავახეთის სახელმწიფო რწმუნებულის ადმინისტრაცია ერთადერთია,რომელმაც, ინფორმაციის ხელმისაწვდომობის კუთხით, 100%-იანი შედეგი აჩვენა.

საუკეთესო მაჩვენებლით, ცხრა საკრებულოს შორის მოხვდა, ახალციხის მუნიციპალიტეტის საკრებულოც.

2018 წელს ინფორმაციის ხელმისაწვდომობის ყველაზე მაღალი, 100%-იანი მაჩვენებელი, 64 მუნიციპალიტეტიდან, 12 მუნიციპალიტეტს აქვს, აქედან მხოლოდ სამია მერია, ცხრა კი – საკრებულო.

მონიტორინგის შედეგების თანახმად,2018 წელს, საჯარო ინფორმაციის ხელმისაწვდომობის ხარისხი წინა წელთან შედარებით მცირედით გაუარესდა. IDFI-მ 282 საჯარო დაწესებულებაში გაგზავნილი 6,413 მოთხოვნიდან სრულყოფილი პასუხი მიიღო 3,653 განცხადებაზე, არასრულყოფილი - 493 მოთხოვნაზე, უარი - 33 შემთხვევაში, უპასუხოდ დატოვებულ იქნა 959 მოთხოვნა. საჯარო დაწესებულებების ყველაზე დიდმა ნაწილმა (20%) არ გაასაჯაროვა პრემიებისა და სახელფასო დანამატების გაცემის შესახებ მოხსენებითი ბარათები. ასევე პრობლემური იყო საწვავის მოხმარებაზე არსებული ლიმიტების და ხარჯების, უწყების წინაააღმდეგ დასრულებული სასამართლო დავების და სარესტორნო მომსახურებაზე გაწეული ხარჯების შესახებ ინფორმაციის მიღება.

[sknews.ge]