სამცხე-ჯავახეთის გუბერნატორების გავლილი მანძილი ბოლო ორ წელში დედამიწის სამჯერ შემოვლის ტოლია - IDFI

ინფორმაციის თავისუფლების განვითარების ინსტიტუტის (IDFI) კვლევა 9 სამხარეო ადმინისტრაციიდან გამოთხოვილ ინფორმაციას ეყრდნობა.

კვლევაში ვკითხულობთ, რომ 9 რწმუნებულის ადმინისტრაციის ბალანსზე 2019 წლის იანვრის მდგომარეობით, 78 ავტომობილია, მათ შორის 9 სამცხე-ჯავახეთის ადმინისტრაციისაა. ავტომობილების 49% მაღალი გამავლობისაა, ხოლო 46% გაპიროვნებულია კონკრეტულ თანამდებობის პირზე ან თანამშრომელზე;

ყველა სახელმწიფო გუბერნატორზე გაპიროვნებულია TOYOTA LANDCRUISER, რომელთა უმრავლესობა გუბერნატორის ადმინისტრაციებს უსასყიდლოდ გადაეცათ.

2017-2018 წლებში 7 გუბერნატორის მიერ სულ დახარჯულია 132,208 ლიტრი საწვავი, მათ შორის სამცხე-ჯავახეთის გუბერნატორებმა 10-10 ათასი ლიტრი დახარჯეს. მთლიანად სამხარეო ადმინისტრაციამ 2017 წელს - 38 485, მომდევნო წელს კი 44256 ლარი დახარჯა.

გასულ ორ წელიწადში 7 გუბერნატორზე გაპიროვნებული ავტომობილების მიერ დაფარულია 750 ათასი კილომეტრი. სამცხე-ჯავახეთის გუბერნატორებმა ორ წელიწადში 126 621 კილომეტრი გაიარეს. სამეგრელო–ზემო სვანეთის და სამცხე–ჯავახეთის გუბერნატორები განვლილი მანძილის მიხედვით, ცხრა სამხარეო ადმინისტრაციას შორის ლიდერობენ.

2017-2018 წლებში გუბერნატორებზე გაპიროვნებული ავტომობილები,საშუალოდ, ყოველდღიურად არასამუშაო დღეების ჩათვლით, დაახლოებით 150
კილომეტრს გადიოდნენ. მაგალითად, სამცხე ჯავახეთის გუბერნატორი 2017 წელს ყოველდღიურად საშუალოდ – 161 კილომეტრს, ხოლო 2018 წელს 185 კილომეტრს ფარავდა.

2017–18 წლებში სამცხე–ჯავახეთში სახელმწიფო რწმუნებულები იყვნენ: აკაკი მაჭუტაძე, კახა სამხარაძე და ბესიკ ამირანაშვილი. ამირანაშვილი მხარის გუბერნატორად 2018 წლის აგვისტოში დაინიშნა.

IDFI-ს აზრით, 2017-2018 წლებში სახელმწიფო გუბერნატორების მაგალითზე განხილული საწვავის მოხმარების პრაქტიკა, რაც გამოიხატება ცალკეულ შემთხვევებში არაგონივრულად მაღალი ოდენობის საწვავის ათვისებაში, ცალსახად მიუთითებს კონტროლის მექანიზმების გაუმჯობესების აუცილებლობაზე. კერძოდ, მიზანშეწონილია, შესაბამისი ტექნოლოგიური სისტემის დანერგვით გამკაცრდეს სამსახურეობრივი ავტომობილებით არამიზნობრივი გადაადგილების მონიტორინგი და ყველა ავტომობილზე დაინერგოს საწვავის მოხმარების აღრიცხვის სისტემა - ე.წ. ჩიპი.

[ავთო ინასარიძე, ახალციხე]