ვინ ფლობს ვარძიის მიმდებარედ მიწის ნაკვეთებს

32–დან 19 მიწის ნაკვეთი სახელმწიფოს ბალანსზეა, 13 კი კერძო კომპანიებს ეკუთვნით. გასხვისებული მიწები ვარძიის მოპირდაპირე ფერდობზე და მის წინ მდებარე ვაკეზეა.

ხუთ სხვადასხვა ადგილზე მიწის ნაკვეთს ფლობს შპს „ვაზისუბნის მამული“, ჯამში 31 512 კვ. მეტრს. აღნიშნული კომპანია თიბისი ბანკის სამეთვალყურეო საბჭოს ყოფილი წევრების მამუკა ხაზარაძის და ბადრი ჯაფარიძის მფლობელობაშია. ხუთივე ნაკვეთი „ტერაბანკში“ იპოთეკითაა დატვირთული.

„ვაზისუბნის მამულის“ ხუთი ნაკვეთიდან ოთხი ვარძიის მოპირდაპირე ფერდზე შპს „ნიალასთან“ ახლოს მდებარეობს, ეს ის ადგილია, სადაც კულუტრული მემკვიდრეობის დაცვის ეროვნულმა სააგენტომ რუსეთში მცხოვრებ ბიზნესმენს 120– ნომრიანი სასტუმროს მშენებლობის ნებართვა არ მისცა და სამუშაოები შეუჩერა.

შპს „ნიალა“ ამ ფერდზე 13 873 კვ. მეტრ მიწის ნაკვეთს ფლობს. მისი მფლობელები წარმოშობით ბორჯომელი, რუსეთში მოღვაწე ბიზნესმენი, მოსკოვის ყოფილი ვიცე-მერი სოსო ორჯონიკიძე და ასპინძის ყოფილი გამგებელი ემზარ ასპანიძე არიან.

საქართველოს საპატრიარქოს ახალციხისა და ტაო–კლარჯეთის ეპარქია აქ ორ მიწის ნაკვეთს ფლობს. მათი საერთო ფართობი ჯამში 29 800 კვ. მეტრია.

4 326 კვ. მეტრი ეკუთვნის შპს „ცერი 2008–ს“. აღნიშნული კომპანიის დირექტორი ზურაბ ზარიძეა. 33.34% წილის მფლობელი ნანა ტაბატაძეა, იგი რუსეთის ფედერაციის მოქალაქეა, 33.34% ფლობს მაკა თევდორაძე, 16.66%–16.66% წილის მფლობელები კი ნატო კორსანტია და ალექსანდრე მიქაძე არიან.

„ვარძია 2011–ს“ ძეგლის მიმდებარედ 2 795 კვ. მეტრი უკავია; ამ კომპანიის დირექტორიც და 50%–იანი წილის მფლობელიც ბექა ლონდარიძეა. ამდენივეს ფლობს გიორგი მერაბიშვილი. ბექა ლონდარიძე საქართველოს მეშვიდე მოწვევის პარლამენტის (2008–2012) და "ნაციონალური მოძრაობის" წევრის გელა ლონდარიძის შვილია.

1 500 კვ მეტრს ფლობს გულქან მელიქიძე. იგი წლების განმავლობაში სოციალური მომსახურების ასპინძის რაიონული განყოფილების ხელმძღვანელი იყო;

ახალქალაქის მუნიციპალიტეტში მცხოვრებლებს კუკური მეტრეველს, ნატო მეტრეველს და ნოდარ ბერიძეს 2400 კვ. მეტრი უკავიათ.

სახელმწიფო 18 ნაკვეთიდან ორი ასპინძის მუნიციპალიტეტის ბალანსზეა – ჯამში ეს ფართობი 339 164 კვ. მეტრია;

[თინათინ ზაზაძე, ახალციხე]