’40-მდე მოსწავლით გარეთ ვრჩები’– ახალციხეში მოკრივეებისთვის სავარჯიშო ადგილი ვერ გამოინახა

კრივის მწვრთნელს გევორქ შუშანიანს აღსრულების ეროვნულმა ბიურომ ახალციხის მესამე სკოლის დარბაზის დასაცლელად ერთთვიანი ვადა მისცა, ამიტომ ქალაქში თავისუფალი ფართის მოძიების მიზნით მან ახალციხის მერს ზაზა მელიქიძეს მიმართა.

„ერთი თვე რომ გავა, წარმოდგენა არ მაქვს სად უნდა წავიდეთ მე და ჩემი მოსწავლეები. არ ვიცი რა იქნება. მერთანაც კი ვიყავი მისული, მაგრამ იმედი არ მაქვს არაფრის. არადა აგვისტოში თბილისში ევროპის ჩემპიონატი ტარდება 2005–2006 წლიანებში და გვინდა, რომ მონაწილეობა მივიღოთ, მაგრამ როგორ, ან სად უნდა მოვემზადოთ აღარ ვიცი“, – ამბობს შუშანიანი.

ახალციხის მერი ზაზა მელიქიძე ამბობს, რომ ქალაქში თავისუფალი სივრცე, სადაც მოკრივეები ვარჯიშს შეძლებენ, არ არის: „ამ ეტაპზე ფართი არ გვაქვს მუნიციპალიტეტში. თუმცა, სადაც საცუარაო აუზი შენდება, სამომავლოდ იქ იქნება ერთ–ერთი დარბაზი სპორტის სხვადასხვა კლუბებისთვის. კონკრეტულს ვერაფერს ვერ გეტყვით, მაგრამ ჯერ განხილვის პროცესშია ყველაფერი“.

ახალციხის მესამე სკოლაში კრივის მწვრთნელს სკოლის საკუთრებაში არსებული სპორტის დარბაზი უკვე წელიწადზე მეტია ნებართვის გარეშე უკავია. პირველ აპრილს, მას დარბაზის დაცლა აღსრულების ეროვნულმა ბიურომ მოსთხოვა, რის გამოც 40 მოსწავლე სავარჯიშო სივრცის გარეშე რჩება.

[მარიამ ბარძიმაძე, ახალციხე]