ახალციხეში კრივის მწვრთნელს აღსრულების ბიურომ დარბაზი დააცლევინა

ახალციხის მესამე საჯარო სკოლის სპორტის დარბაზი კრივის ინვენტარისგან დღეს, პირველ მაისს დაცალეს.

ერთ თვიანი ვადა, რომელიც მწვრთნელს, გევორქ შუშანიანს, ნებართვის გარეშე დაკავებული დარბაზის დასაცლელად ბიურომ მისცა, სწორედ დღეს ამოიწურა.

„გავიდა ის მოცემული ვადა, მაგრამ სკოლის დირექტორმა მითხრა, რომ შეგვეძლო ეს ინვენტარი დარბაზში დაგვეტოვებინა და ბავშვებს ვარჯიში გაეგრძელებინათ. შეიძლება ითქვას, რომ მან მოგვატყუა. ახლა არ ვიცი სად უნდა წავიღო ეს ინვენტარი ან საერთოდ სად უნდა წავიდეთ“, – ამბობს კრივის მწვრთნელი გევორქ შუშანიანი.

აღნიშნულზე, ახალციხის მესამე სკოლის დირექტორი სუსანა აკოპოვა „სამხრეთის კარიბჭესთან“ კომენტარს არ აკეთებს.

აღსრულების ეროვნულ ბიუროში კი ამბობენ, რომ ერთ თვიანი ვადის გასვლის შემედეგ, გევორქ შუშანიანს კვლავ დროის გახანგრძლივება სურდა, თუმცა ვადა აღარ გაუგრძელეს.

შეგახსენებთ, რომ ახალციხის მესამე სკოლაში კრივის მწვრთნელს სკოლის საკუთრებაში არსებული სპორტის დარბაზი უკვე წელიწადზე მეტია ნებართვის გარეშე უკავია. პირველ აპრილს, მას დარბაზის დაცლა აღსრულების ეროვნულმა ბიურომ მოსთხოვა, რის გამოც 40 მოსწავლე სავარჯიშო სივრცის გარეშე რჩება.

ქალაქში თავისუფალი ფართის მოძიების მიზნით, შუშანიანმა ახალციხის მერს ზაზა მელიქიძესაც მიმართა.



[მარიამ ბარძიმაძე, ახალციხე]