ახალციხეში კრივის საქალაქთაშორისო ტურნირი გაიმართა [ფოტო]

საქალაქთაშორისო ტურნირი, „ახალციხის 2019 წლის ღია პირველობაში“ მონაწილეობას 2006–2007 წლებში დაბადებული სპორტსმენები იღებენ. სულ 55 მონაწილეა საქართველოს შვიდი ქალაქიდან: ახალქალაქი, ბორჯომი, გორი, ჭიათურა, ერედვი, ახმეტა და მასპინძელი ახალციხე.

ჩემპიონატი ოთხ ოქტომბერს დაიწყო და დღეს, ექვს ოქტომბერს ფინალური შეჯიბრი იმართება. საბოლოოდ, გამარჯვებულები 22 წონითი კატეგორიაში დასახელდებიან.

„კარგად მიმდინარეობს ტურნირი, კარგი ორგანიზებაა. ვფიქრობთ, რომ ყველა კმაყოფილი დაბრუნდება. 12–13 წლის ასაკი, რომელშიც სპორტსმენები ეჯიბრებიან ერთამენს, ის ასაკია, რომელმაც მომავალ წელს ევროპის ჩემპიონატზე უნდა მიიღოს მონაწილეობა“, – ამბობს საერთაშორისო კატეგორიის მწვრთნელი ავთანდილ შოშიაშვილი.

ტურნირს ორგანიზება ახალციხის მუნიციპალიტეტის მერიამ, სპორტის განყოფილებამ და სასპორტო სკოლამ ერთობლივად გაუწიეს.

„ჩემპიონატში ძირითადად სასპორტო სკოლის ბავშვები მონაწილეობენ, ვინც დადის კრივის ვარჯიშებზე. გამარჯვებულებს სიმბოლურად სიგელებითა და მედლებით დავაჯილდოებთ“, – ამბობს ახალციხის მუნიციპალიტეტის მერიის სპორტული პროგრამების უფროსი სპეციალისტი, გელა ძამუნაშვილი.







[თაკო ფეიქრიშვილი, ახალციხე]