78 წელი სპორტის სამსახურში

ახალციხეში სასპორტო სკოლა 1938 წლიდან არსებობს. თავდაპირველად მას ,”ბავშვთა და მოზარდთა სპორტული სკოლა“ ეწოდებოდა და მისი პირველი დირექტორი არტაშეს პაზოევი იყო.

სკოლის ამჟამინდელი დირექტორი იხსენებს, რომ თავდაპირველად სპორტსკოლაში მხოლოდ 5 მიმართულება იყო: მძლეოსნობა, კრივი, ფეხბურთი, ჭადრაკი და ძალოსნობა. მოგვიანებით მას რამდენიმე მიმართულება დაემატა .

ამჟამად აქ თითქმის 10–მდე სხვადასხვა სპორტული წრეა: ძალოსნობა, კრივი, ჭადრაკი, თავისუფალი ჭიდაობა, ფეხბურთი, რაგბი, კიკბოქსინგი, ველოსპორტი და კალათბურთი.



სასპორტო სკოლაში სწავლა უფასოა. სკოლას ქალაქის მერია აფინანსებს. 2016 წელს ადგილობრივი ბიუჯეტიდან ახალციხის სასპორტო სკოლისთვის 176.000 ლარია გამოყოფილი.

სასპორტო სკოლაში მისვლა მესამე კლასის ასაკიდან შეიძება. ზედა ასაკობრივი ზღვარი კი დადგენილი არ არის. ამ ეტაპზე სკოლას 223 მოსწავლე ჰყავს.

"ახალგაზრდები სპორტით ყოველთვის იყვნენ დაინტერესებული, ჩვენც ვცდილობთ შევუქმნათ მათ შესაბამისი პირობები. ამჟამად ყველაზე მოთხოვნად მიმართულებად კრივი და რაგბი ითვლება. შესაბამისად, ყველაზე მეტი წარმატებაც სპორტის ამ სახეობებში გვაქვს. წლების განმავლობაში ლიდერი სპორტი იყო ძალოსნობა, თუმცა ახალი თაობა რატომღაც თავს იკავებს და არ მიყვება ამ მიმართულებას“, - ამბობს სასპორტო სკოლის დირექტორი გრიგორ ტაბატაძე.

სასპორტო სკოლაში ეამაყებათ, რომ მათ აღზარდეს 2011 წლის ევროპის ჩემპიონი კრივში ჯაბა ხოსიტაშვილი.

„ჩვენი სასპორტო სკოლის ბავშვები ყოველთვის ძლიერები იყვნენ კრივის მიმართულებაში. აქტიურად ვმონაწილეობთ სხვადასხვა ჩემპიონატებში, გვაქვს უამრავი წარმტება და დიდ იმედებს ვამყარებთ ახალ თაობაზე“, – გვეუბნება კრივის მწვრთნელი არტურ ამბარიანი და ამატებს, რომ უახლოეს მომავალში სკოლას ახალი სავარჯიშო რინგი ექნება, – „ვფიქრობთ, რომ განახლებულ პირობებში ახალგაზრების ვარჯიში მეტად ნაყოფიერი იქნება“.

ხოსიტაშვილის მსგავსად სასპორტო სკოლაში მოკრივე ხვიჩა გიგოლაშვილი ეიმედებათ.

"ვარჯიში 15 წლიდან დავიწყე, მქონდა დიდი შემართება, თუმცა ვერ წარმოვიდგენდი, რომ 20 წლის ასაკში უკვე მექნებოდა ამდენი წარმატება. მე ვიმყოფებოდი სარეიტინგო ბრძოლებზე ინგლისში და იტალიაში. ჩემი მიზანი მსოფლიო ჩემპიონობაა“, - ამბობს ხვიჩა გიგოლაშვილი.



[ეკა ბერიძე, ახალციხე]