'სტიგმას აუტიზმის მიმართ საზოგადოების დამოკიდებულება აჩენს’

ახალციხის ცენტრალურ პარკში პირველი სკოლის მოსწავლეებმა აუტიზმის შესახებ მომზადებული საინფორმაციო ფლაერები დაარიგეს. მოზარდები ამბობენ, რომ მიზანი აუტისტური სპექტრის მქონე პირების მიმართ საზოგადოებაში ცნობიერების ამაღლებაა.

„ადამიანებს ვეკითხებით, სმენიათ თუ არა აუტიზმის შესახებ და მათ მოკლე ინფორმაციას ვაწვდით, თან ფლაერებსაც ვურიგებთ“, – ამბობს მეცხრე კლასის მოსწავლე მარიამ ბოჩიკაშვილი.



ამის შემდეგ აუტიზმთან დაკავშირებით საინფორმაციო ხასიათის შეხვედრა გაიმართა, პრეზენტაციის შემდეგ კი მონაწილეებმა დისკუსია გამართეს. შეხვედრას „ბავშვთა და მოზარდთა განვითარების ცენტრის“ დამფუძნებელი ელისო თათეშვილი უძრვებოდა: „ჩემს შვილსაც აუტისტური სპექტრის დარღვევა აქვს და ამიტომ კარგად ვიცი თუ რა პრობლემების წინაშე დგანან მშობლები. ვცდილობ რაც შეიძლება მეტ ადამიანს დავეხმარო. როცა საერთო პრობლემის წინაშე ადამიანი დგას მარტო, უფრო მეტად იკეტება საკუთარ თავში. ჩემი აქტივიზმით მინდა მშობლებს მეტი სტიმული მივცე და ბავშვები გამოიყვანონ გარეთ. ეს ბავშვები ჩვეულებრივი ადამიანები არიან, უბრალოდ განსხვავებული ინტერესები და ხასიათი აქვთ“.



ელისო ამბობს, რომ სტიგმას აუტიზმის მიმართ საზოგადოების დამოკიდებულება აჩენს და გამოსავალი მხოლოდ ცნობიერების ამაღლებაა: „ინტერნეტ სივრცე სავსეა ამ ინფორმაციით, თუმცა თუ ადამიანს არ უწევს რეალურ ცხოვრებაში შეხება ამ პრობლემასთან, რთულია გაგება. დღესდღეობით ვფიქრობ, რომ საგანმანათლებლო სისტემა აქტიურად ცდილობს ამ ბავშვების საზოგადოებაში ინტეგრირებას, სკოლებში სპეციალური ოთახებიც იქმნება, თუმცა ამ ბავშვებს ინდივიდუალური თანმდგომი პირები სჭირდებათ. განსაკუთრებით რეგიონებშია ეს პრობლემა“.

ამჟამად „ბავშვთა და მოზარდთა განვითარების ცენტრს“ სულ სამი ბენეფიციარი ჰყავს, თუმცა ორგანიზაციაში ამბობენ, რომ ხშირად აუტისტური სპექტრის აშლილობის მქონე ბავშვების გამოჩენისგან მშობლები თავს იკავებენ, შესაბამისად, არც ცენტრში არსებული სერვისებით სარგებლობენ.



დღეს, ორ აპრილს მსოფლიოში აუტიზმის შესახებ ცნობადობის ამაღლების საერთაშორისო დღე აღინიშნება. ამ დღის მიზანი აუტიზმის შესახებ საზოგადოების ცნობიერების ამაღლებასთან ერთად არის ის, რომ ხელი შეუწყოს აუტიზმის მქონე ადამიანების ფუნდამენტური უფლებების დაცვასა და რეალიზებას.



[ავთო ინასარიძე, ახალციხე]