აუტიზმის მსოფლიო დღეს ახალციხეში დისკუსია გაიმართა [Video]

შეხვედრა „ახალციხის დემოკრატიული ჩართულობის ცენტრში“, ცენტრის ორგანიზებით გაიმართა.

როგორც ცენტრში განმარტავენ, შეხვედრის მიზანი აუტიზმის შესახებ საზოგადოების ცნობიერების ამაღლება იყო. დისკუსიას ახალციხის საჯარო სკოლების ინკლუზიური განათლების პედაგოგები, ფსიქოლოგები, სამცხე-ჯავახეთის სახელმწიფო უნივერსიტეტის სტუდენტები და ახალციხს სკოლების მოსწავლეები ესწრებოდნენ.

„ბავშვები, რომლებსაც აუტიზმის სინდრომი აქვთ, საზოგადოების ჩვეულებრივი, რიგითი წევრები არიან და ისეთივე სითბო, ყურადღება და მიმღებლობა სჭირდებათ, როგორც სხვა ბავშვებს. ჩვენი დამოკიდებულება მათ მიმართ უნდა იყოს გონივრული და უნდა ვეცადოთ, რომ მათ შევუქმნათ პირობები, რომ სხვებისთვისაც იყვნენ მისაღები“, - ამბობს ახალციხის მეშვიდე საჯარო სკოლის ფსიქოლოგი დალი ასპანიძე.

შეხვედრაზე აღინიშნა, რომ ერთ-ერთ მნიშვნელოვანი პრობლემა აუტიზმის შესახებ საზოგადოებაში ინფორმაციის არქონაა.

„მე ვფიქრობ, რომ დღეს საზოგადოება მეტ-ნაკლებად უფრო იცნობს ამ დაავადებას, ბოლო რამდენიმე წელიწადია აქტიურად ხდება ამ თემის გაშუქება. თუმცა, პრობლემას მაინც ხშირად ვაწყდებით“, - ამბობს ფსიქოლოგიური მომსახურების ცენტრის „მწვანე სახლის“ ახალციხის ფილიალის დირექტორი ელისო თათეშვილი და ამატებს, რომ იმისათვის, რომ პრობლემა მოგვარდეს და ეს ბავშვები საზოგადოებისგან გარიყული არ იყვნენ, ამ თემაზე ხშირი დისკუსიებისა და შეხვედრების გამართვაა საჭირო.

მას შემდეგ, რაც, დალი ასპანიძემ და ელისო თათეშვილმა ახალგაზრდებს აუტიზმის შესახებ ინფორმაცია მიაწოდეს, შეხვედრაზე აჩვენეს ფილმი „ჩემი სახელია ბექა“, რომელიც აუტისტი ბიჭის ცხოვრებას მოგვითხრობს.



[თამარ თოთაძე, ახალციხე]