ჭელაში დაკავებულები 2000-ლარიანი გირაოს სანაცვლოდ გაათავისუფლეს

რაინდი შანთაძის, ვახტანგ მარკოიძის და გენადი აბაშიძის სასამართლო პროცესი ნახევარი საათის წინ დასრულდა.

ახალციხის რაიონულმა სასამართლომ პირველადი წარდგენისას განიხილა პროკურორის შუამდგომლობა ბრალდებულების მიმართ აღკვეთის ღონისძიების შეფარდების შესახებ და ბრალდებულებს გირაოს სახით 2000 ლარის გადახდა დააკისრა. მათ აღნიშნული თანხა 30 კალენდარული დღის ვადაში უნდა გადაიხადონ.

სამივე ბრალდებულს ახალგაზრდა იურისტთა ასოციაციის ადვოკატი რევაზ რევაზიშვილი და ნუგზარ სამარჯიშვილი იცავდნენ.

ადვოკატებმა სასამართლოს ბრალდებულების აღკვეთი ღონისძიების გარეშე დარჩენა სთხოვეს, თუმცა, მოსამართლე გიორგი ლონდარიძემ მათი შუამდგომლობა არ დააკმაყოფილა.

„სამივე ბრალდებული გაჭირვებული ოჯახიდან არიან. მათი მატერიალური მდგომარეობა არ იძლევა საშუალებას, რომ მათ აღნიშნული ოდენობის თანხა გადაიხადონ“,- ამბობს ადვოკატი ნუგზარ სამარჯიშვილი.

შემდეგი პროცესი 2013 წლის 16 ოქტომბერს ჩაინიშნა.

„16 ოქტომბრამდე გვაკისრია ვალდებულება სასამართლოს წარუდგინოთ ჩვენ ხელთ არსებული მტკიცებულებები. გამოძიება გრძელდება და შეცდებით მათი უდანაშაულობის დამტკიცებას“,-ამბობს ნუგზარ სამარჯიშვილი.

შეგახსენებთ, ამ სამი პირის წინააღმდეგ საქმე სსკ-ის 353-ე მუხლის მე-2 ნაწილითაა აღძრული, რაც 4-დან 7 წლამდე პატიმრობას ითვალისწინებს.

[sknews.ge]