3 პირის წინააღმდეგ სისხლის სამართლის საქმე აღიძრა

იმ სამი დაკავებულიდან, რომელთა მიმართაც სისხლის სამართლის საქმეა აღძრული, ერთი სოფელ ჭელის მცხოვრებია, სამი კი სოფელ საირმის. რაინდი შანთაძე, ვახტანგ მარკოიძე და გენადი აბაშიძე ამ დრომდე სამმართველოს შენობაში რჩებიან.

ნუგზარ სამარჯიშვილის თქმით, ამ ადამიანების წინააღმდეგ ჯერ არ არსებობს მტკიცებულებები, ახლა მიმდინარეობს შეგროვება: „თუ 48 საათის განმავლობაში ვერ შეგროვებენ და ვერ წაუყენებენ ბრალს, გაათავისუფლებენ. არ არის გამორიცხული, რომ ბრალის წაყენებამდე გაათავისუფლონ“.

სამარჯიშვილი ამბობს, რომ ამ სამ დაკავებულს პოლიციისთვის წინააღმდეგობის გაწევაში ადანაშაულებენ. სავარაუდოდ,მათ ედავებიან პოლიციის თანამშრომლისთვის ქვის დაშენაში: „შეუძლებელია ამ სამ ადამიანს წინააღმდეგობა გაეწია ათობით სპეცრაზმელისთვის. აღნსავლური ორთაბრძოლების წარმომადგენლებიც რომ ყოფილიყვნენ, ამას მაინც ვერ შეძლებდნენ“.

შენობაში რჩებიან სხვა დაკავებულებიც, რომელთა მიმართაც საქმის წარმოება ადმინისტრაციული წესით მიმდინარეობს.

ნუგზარ სამარჯიშვილის თქმით, დაკავებულებს შორის არიან დაზარალებულებიც. ისინი უკვე მოინახულა ექსპერტმა: „დაიდება ექსპერტიზის დასკვნა მათი დააზიანებების შესახებ“.

იმ 6 დაკავებულის სასამართლო, რომელთა მიმართაც საქმის წარმოება ადმინისტრაციული წესით მიმდინარეობს, სავარაუდოდ, ხვალ, 27 აგვისტოს, გაიმართება.

სამცხე-ჯავახეთის სამხარეო სამმართველოს შენობასთან ამ დრომდე რჩებიან ადიგენის სოფლების მცხოვრებლები. ისინი ამბობენ, რომ დაშლას არ აპირებენ.

როგორც ინტერნეტგამოცემა „ნეტგაზეთს“აჭარის მუფთმა განუცხადა, აჭარიდან მუსლიმები ახალციხეში ხვალ გამოემგზავრებიან, წალკიდან კი დღეს, ღამის 11 საათზე წავლენ. ტარიელ ნაკაიძის თქმით, მუსლიმები საქართველოს ყველა რეგიონიდან ახალციხეში ჩასვლას გეგმავენ.

[sknews.ge]