ორი წლის წინ რეაბილიტირებული კულტურის სახლის სახურავი ბორჯომში ისევ სარემონტოა

ბორჯომში კულტურის სახლის სახურავიდან ჩამოსული წყალი შენობაში არაერთ ოთახს აზიანებს.

„მიზეზი ისაა, რომ არასწორადაა გადახურული. კონსტრუქციაა ისეთი, რომ სახურავი ერთ ადგილზე ჩაღუნულია და წვიმის დროს წყალი გროვდება. მსგავსი კონსტრუქცია ბორჯომის მსგავს წვიმიან ადგილისთვის არ იყო რეკომენდებული, ეს ხარვეზი მშენებლების არა, მაგრამ დამპროექტებლის ბრალია“, – ამბობს ბორჯომის მერიის ინფრასტრუქტურის სამსახურის უფროსი გიორგი ყიფიანი.

ბორჯომის მერიაში ამბობენ, რომ კულტურისა და ხელოვნების ცენტრს სრული რეაბილიტაცია ბოლო ათწლეულზე მეტია არ ჩატარებია.
ინფრასტრუქტურის უფროს გიორგი ყიფიანის თქმით, წელს კულტურისა და ხელოვნების სახლს სრული რეაბილიტაცია ჩუატარდება, რისთვისაც 700 000 ლარის დახარჯვა იგეგმება. თუმცა, მანამდე სახურავია შესაკეთებელი: „სახურავის რემონტისთვის ხარჯთაღრიცხვა ახლა მზადდება, იქ ჟოლოპებიც არაა“.

ბორჯომის გამგეობის მიერ 2017 წელს კულტურისა და ხელოვნების ცენტრის ნაწილის რეაბილიტაციის ტენდერში ვასილ მჭედლიძემ გაიმარჯვა და სარეაბილიტაციო სამუშაოებისთვის 248 269 ლარი მიიღო. მშენებელი ამბობს, რომ ეს თანხა სახურავის გასაკეთებლად საკმარისი არ იყო: „შენობის სახურავი, დაახლოებით, 1 500 კვადრატული მეტრია. სახურავის ხარისხიანად გადახურვას მეტი თანხა სჭირდებოდა, რისთვისაც 45 ათასამდე ლარი მოვითხოვე, თუმცა მხოლოდ 20 გამოყვეს. შესაბამისად სახურავის ნაწილი ისევ ხით დაფარული დარჩა".

ხელშეკრულების თანახმად მჭედლიშვილის მიერ შესრულებული სამუშაოების საგარანტიო ვადა სამი წელია, ამიტომ მშენებელი სახურავის ნაწილს ხელახლა შეაკეთბს: „თუნუქის სახურავს საკუთარი ხარჯებით შევაკეთებ. ეს ის ადგილია, სადაც წყალი გროვდება და შენობაში ჩადის“.

[ავთო ინასარიძე, ბორჯომი]