ვის დაეკისრა მესხეთის თეატრის დაზიანებული სახურავის შეკეთება?

ახალგადახურული თეატრის სახურავიდან წყალი 8 დეკემბერს ჩავიდა.

შპს „ქრისტინე სარაშვილის“ დირექტორი ნუგზარ სარაშვილი ამბობს, რომ თეატრის გარდეროფსა და ფოიეში წყლის ჩასვლა მათ მიერ შესრულებული სამუშაოების ბრალი არ არის: „სახურავი დაზიანებული არ არის. ჩრდილოეთის მხარეა, ზამთარში თოვლი აწვება, იყინება და წყალი უკან შემოდის“.

მისივე თქმით, მიზეზი წყლის ღარია, რომელიც სახურავზე გადადის: „წყლის ღარი შიგნით გვქონდა შემოტანილი, პროექტში ასე იყო ჩადებული, მაგრამ ამ მხარეს არ გაამართლა, ახლა გარეთ გავიტანთ და პრობლემაც მოიხსნება“.

თეატრის შენობის სახურავზე შესრულებულ სამუშაოები საექსპერტო ჯგუფმა შეისწავლა. ,,ოპტიმალ გრუპ + “–ის ექსპერტებმა სახურავი დაწესებულების ადმინისტრაციასა და სამუშაოების შემსრულებლებთან ერთად გუშინ, 14 იანვარს დაათვალიერეს. დასკვნას რამდენიმე დღეში დადებენ.

შეგახსენებთ, რომ მესხეთის თეატრის სახელმწიფო დრამატული თეატრის სარეაბილიტაციო სამუშაოებისთვის კულტურის სამინისტრომ 140 ათასი ლარი გამოყო. სარეაბილიტაციო სამუშაოებს შპს „ქრისტინე სარაშვილი“ ასრულებდა, თუმცა დროში გაწელილი და უხარისხოდ შესრულებული სამუშაოების გამო კომპანიასთან ხელშეკრულება გაწყდა და სამუშაოებს ექსპერტიზა ჩაუტარდა.

გარდა ამისა, მშენებელი კომპანია ვადაგადაცილების გამო, დაახლოებით 5.200 ლარით დაჯარიმდა. შპს „ქრისტინე სარაშვილის“ დირექტორის ნუგზარ სარაშვილის განმარტებით, თეატრის ადმინისტრაციამ ჯარიმა უსამართლოდ დააკისრა და ამიტომ სასამართლოში ჩივილს გეგმავს, ამისთვის შესაბამის დოკუმენტაციას უკვე ამზადებს.

[თინათინ ზაზაძე, ახალციხე]