გამგეობამ ადმინისტრაციული შენობის სახურავის შეკეთება დაიწყო

ახალციხის ადმინისტრაციული შენობის სახურავი დაზიანებული ნაწილებისაგან უკვე გაწმინდეს.

„ადმინისტრაციული შენობის სახურავთან ერთად, ძლიერმა ქარმა აწყურის კულტურის სახლის სახურავიც გადახადა, ამიტომ აუცილებელი გახდა, რომ სასწრაფოდ გამოყოფილიყო თანხა და სამუშაოები დაწყებულიყო ორივე შენობაზე“, – განმარტავენ ახალციხის მუნიციპალიტეტის გამგეობაში.

უწყების ცნობით, ადმინისტრაციული შენობის სახურავისთვის 7.465 ლარი, აწყურის კულტურის სახლის სახურავისთვის 13. 565 ლარია გამოყოფილი.

შეგახსენებთ, რომ მიმდინარე წლის 23 აპრისლ ძლიერმა ქარმა ადმინისტრაციის შენობის სახურავის ნაწილი გადახადა, რამდენიმე დღის შემდეგ კი მუნიციპალიტეტის გამგეობამ სახურავი დროებით შეაკეთა, რათა წვიმის წყალი არ ჩასულიყო.

ადმინისტრაციის შენობაში ორი უწყება – სამცხე–ჯავახეთის სამხარეო ადმინისტრაცია და ახალციხის მუნიციპალიტეტის გამგეობაა. სახურავი იმ ნაწილშია დაზიანებული, სადაც გამგეობის სამსახურებია. გასული წლის სექტემბრამდე ამ შენობაში იყო ქალაქის მერიაც. 2016 წლის სექტემბრიდან კი მერია სხვა შენობაში გადავიდა.

[ლუბა გიორგაძე, ახალციხე]