ასპინძაში ოთხი სოფლის სასმელი წყლის სისტემის რეაბილიტაცია იგეგმება

სოფლები სარო, ხიზაბავრა, თოკი და ვარგავი სასმელი წყლით ერთი სათავენაგებობიდან მარაგდება. სისტემის საპროექტო სამუშაოებს შპს „ვეგა+“ ახორციელებს. კომპანიამ ასპინძის მუნიციპალიტეტის მერიის მიერ გამოცხადებული ტენდერი 11 560 ლარზე მოიგო. სატენდერო დოკუმენტების მიხედვით ოთხივე სოფლის ცენტრალური სათავე ნაგებობა სრულად და ასევე, მილსადენები უნდა მოწესრიგდეს. თუმცაღა, მილსადენების რეაბილიტაცია იმ ადგილამდე იგეგმება, საიდანაც წყალი ოთხ სოფელში ნაწილდება. ამიტომ სოფელ საროსა და თოკში სოფლის მხარდაჭერის პროგრამის ფარგლებში ადგილობრივებმა ისევ სასმელი წყლის პროექტები შეარჩიეს.

ასპინძის მერიის ინფრასტრუქტურის სამსახურის უფროსი ანზორ ალელიშვილი ამბობს, რომ საროში ‘სოფლის პროგრამის’ ფარგლებში ამ სოფლის სათავენაგებობა გაკეთდება, თოკში კი ორკილომეტრიანი წყლის მილი შეიცვლება.

„ეს კონკრეტული პროექტები არ იყო გათვალისწინებული იმ პროექტში, რაზეც მერია ტენდერს აცხადებს. საროს მუდმივად პრობლემა ჰქონდა, რომ გაუმართავი სათავენაგებობის გამო მღვრიე წყალი მოდიოდა, ხოლო თოკი ამორტიზებული მილით ბევრ წყალს კარგავდა“, – ამბობს ალელიშვილი.
საროშიც და თოკშიც სოფლის მხარდაჭერის პროგრამის ფარგლებში გამოყოფილი თანხის ოდენობა 10 000– 10 000 ლარია.

რა დაიხარჯება ამ სოფლების ცენტრალური სათავე ნაგებობის რეაბილიტაციისთვის უცნობია. მერიაში ამბობენ, რომ ეს მას შემდეგ გახდება ცნობილი, რაც საპროექტო სამუშაოები დასრულდება.

ასპინძაში, “სოფლის მხარდაჭერის პროგრამის“ ფარგლებში სახელმწიფომ ჯამში 304 000 ლარი გამოყო.

[ლუბა გიორგაძე, ასპინძა]