სახალხო დამცველის აპარატი ჭელაში ხვალ ჩამოვა

ამის შესახებ "სამხრეთის კარიბჭეს" სახალხო დამცველის აპარატის საზოგადოებასთან ურთიერთობის სამსახურის უფროსმა ნინო ერემაშვილმა განუცხადა.

„ჩვენი წარმომადგენლები ვითარებას ადგილზე გაეცნობიან, ისინი ახალციხეს ხვალ ეწვევიან“, - განაცხადა ერემაშვილმა. მისივე თქმით, ომბუდცმენის აპარატი ხვალ გაავრცელებს მომხდართან დაკავშირებით ოფიციალურ განცხადებასაც.

შეგახსენებთ, დღეს, 26 აგვისტოს, ადიგენის მუნიციპალიტეტის სოფელ ჭელაში მინარეთის დემონტაჟი განხორციელდა. რამდენიმე საათის განმავლობაში სოფლამდე მისასვლელი გზა გადაკეტილი იყო.

დემონტაჟის დროს დააკავეს რამდენიმე ადგილობრივი. ჭელის მცხოვრებლების განცხადებით, არიან ნაცემებიც. სოფლამდე მისასვლელი გზა მას შემდეგ გაიხსნა, რაც მინარეთის დემონტაჟი დასრულდა. ამის შემდეგ ათობით ადგილობრივმა ახალციხეში, სამახარეო სამმართველოს შენობასთან გადაინაცვლა, სადაც დაპირისპირება მოხდა და კიდევ რამდენიმე ადამიანი დააკავეს. აქ მოსახლეობა ამ დრომდე რჩება. შენობიდან გამოუშვეს 7 დაკავებული, 16 შენობაში რჩება.

[sknews.ge]