ჭელისკენ მიმავალი გზა გადაკეტილია

ადიგენის მუნიციპალიტეტის სოფელ ჭელამდე „სამხრეთის კარიბჭე“ მისვლას ვერ ახერხებს. ჩვენი კორესპონდენტის, თამუნა უჩიძის ინფორმაციით, რამდენიმე საათია სოფელ ზარზმასთან გზა გადაკეტილია. ადგილზე მობილიზებული არიან დაცვის პოლიციის თანამშრომლები. მათი განცხადებით, გადაკეტილი მონაკვეთიდან ასიოდე მეტრში მოხდა ავარია, მიმდინარეობს სამაშველო სამუშაოები და გზა ამის გამო გადაიკეტა. პოლიციის თანამშრომლები ავარიის დეტალებს არ აკონკრეტებენ.

სოფელ ზარზმასთან გაჩერებულია ათობით მანქანა. მათ შორის, სამარშრუტო ტაქსებიც.

„2 საათია გაჩერებული ვართ. ექიმთან ვიყავი, სახლში ვბრუნდებოდი და არ გვიშვებენ. ამბობენ, რომ რაღაც შენობა შენდება და ამიტომაა გზა გადაკეტილიო. არაფერი ვიცით“, - გვითხრა სოფელ ჭელის მცხოვრებმა ზურა ირემაძემ.

„სამხრეთის კარიბჭემ“ სცადა გადაკეტილი მონაკვეთი ფეხით გაევლო, თუმცა, პოლიციის თანამშრომლებმა ჩვენს კორესპონდენტს გადაადგიულების საშუალება არ მისცეს.

შეგახსენებთ, ამ წუთებში სოფელ ჭელაში მინარეთის დემონტაჟი მიმდინარეობს.

[sknews.ge]