მუფთი ასლან აბაშიძე: აჭარელი მუსლიმები ახალციხისკენ მიემართებიან

ფოტო: ტაბულა
„ვჩერდებით იმიტომ, რომ როგორმე სახელმწიფომ გამოიჩინოს კეთილი ნება და ეს საკითხი მშვიდობიანად გადაწყდეს. ხალხი არის აღელვებული და შეურაცხყოფილი, სპეცრაზმმა ჩაკეტა საზოგადოება, მოჭრეს მინარეთი, ვინც წინააღმდეგობა გაუწია, სასტიკად სცემეს.
მეც მრევლთან ერთად ვართ, შეიძლება გავჩერდეთ, იქედან გამომდინარე, რომ არ მოხდეს დესტაბილიზაცია სახელმწიფოში და არ დაიწყოს არეულობა რელიგიის ნიადაგზე. ჩვენ რადგანაც გვინდა სტაბილურობის შენარჩუნება, იქედან გამომდინარე, დავიცდით დანისპარაულში, ხელისუფლებამ ეს საკითხი დადებითად რომ გადაჭრას“,- განაცხადა მუფთმა გაზეთ "ბათუმელებთან" საუბრისას.

სოფელ ჭელაში დღეს დილით მინარეთი დაანგრიეს, ხოლო მრევლის წარმომადგენლები სცემეს და დააკავეს. მუფტის - ასლან აბაშიძის ინფორმაციით, მრევლი ამ ფაქტის გამო არის აღშფოთებული.

შეგახსენებთ, ჭელის მინარეთის დემონტაჟის გადაწყვეტილება ადიგენის მუნიციპალიტეტის საკრებულომ 20 აგვისტოს გამოიტანა. დღეს კი ჭელაში მინარეთის დემონტაჟი განხორციელდა. რამდენიმე საათის განმავლობაში გადაკეტილი იყო სოფლისკენ მიმავალი გზა. მოძრაობა მას შემდეგ აღდგა, რაც სოფლიდან მინარეთი გამოიტანეს. ქართველ მუსლიმთა კავშირის თავმჯდომარის ტარიელ ნაკაიძის განცხადებით,პოლიციამ ადგილობრივები დააშინა და ტელეფონები გაათიშინა.ამ წუთებში მუსლიმები სამცხე-ჯავახეთის სამხარეო სამმართველოს შენობასთან არიან შეკრებილი და დაკავებულების გამოშვებას ითხოვენ.

[sknews.ge]