გათავისუფლებული მუშები: „უნდოდათ დამატებითი სამუშაო ანაზღაურების გარეშე შეგვესრულებინა“

პავლე ათუნაშვილი და ივანე დავიდოვი შპს „კეთილმოწყობაში“ 2009 წლიდან მუშაობდნენ. 2018 წლის დეკემბრის ბოლოს მათ სამსახურში უთხრეს,რომ ხელშეკრულებებს ვადა ამოეწურა და აღარ გაუგრძელებდნენ. ყოფილი თანამშრომლები ფიქრობენ, რომ ისინი სამსახურის უფროსმა მათი პროტესტის გამო გაათავისუფლა.

„კობა კურტანიძემ გვითხრა 09:00–დან 18:00 საათამდე მუშაობთ,მაგრამ თუ ექვსი საათის მერე რამე გაფუჭდა, უნდა გამოხვიდეთ და გააკეთოთო, არასამუშაო დროს მუშაობას კი არ აგინაზღურებთო, ამაზე უარი ვუთხარით. კურტანიძემ კი გვიპასუხა ეს პირობები თუ არ მოგწონთ სამსახურიდან წადითო“, – ამბობს „კეთილმოწყობის“ ყოფილი თანმაშრომელი პავლე ათუნაშვილი.

გათავისუფლებული თანამშრომლები აცახდებენ, რომ ხელმძღვანელებთან ეს უთანხმოების პირველი შემთხვევა არაა.

„გასული წლის აგვისტოს ერთ–ერთ ობიექტზე კობა კურტანიძე სამუშაოების შესრულებას გვთხოვდა. გვითხრა, კომპანიასთან ხელშეკრულება გავაფორმეთ და საქმე ჩვენ უნდა გავაკეთოთო. ვუთხარით ჩვენთვის ხელშეკრულების პირობები გაეცნო, რაზეც უარი გვითხრა, თუ არ მოგწონთ წადითო“, – იხსენებს პავლე ათუნაშვილი და ამატებს, რომ ამ საუბრის შემდეგ მან საყვედური წერილობით მიიღო.

„კეთილმოწყობის“ ყოფილი მუშები აცხადებენ, რომ მათ არ იცოდნენ ხელშეკრულების მიხედვით კონკრეტულად რა საქმის კეთება ევალებოდათ.

„მთავარმა სპეციალისტმა გურამ ნებაძემ მითხრა, ერთ–ერთ ობიექტზე რკინის ბოძები შეღებეო, თუ არ შეღებავ ახსნა–განმარტებით ბარათს დავწერო, როგორც გაირკვა ეს საქმე ხელშეკრულებით ნამდვილად გვეკუთვნოდა, მაგრამ ეს ჩვენ არ ვიცოდით. ხელშეკრულების ნახვა რომ ვთხოვე, არ გვაჩვენეს, საბუთებში რას იჩხრიკებითო,“ – გვიყვება ათუნაშვილი.

შპს „კეთილმოწყობის სამსახურის“ უფროსი, კობა კურტანიძე ბრალდებებს უარყოფს და ამბობს, რომ თანმაშრომლები სამსახურიდან არ გაუთავისუფლებია, კურტანიძე იმასაც უარყოფს, რომ თანამშრომლებს დამატებითი სამუშაოს შესრულებას თხოვდა.

„სამსახურში საქმეს ვინც უკეთესად აკეთებს იმას ვტოვებ, ვინც ვერ ასრულებს ვათავისუფლებ. არასდროს ყოფილა, რომ მეთქვას ზეგანაკვეთური იმუშავეთ–თქო, ხელშეკრულებით არსებულ საქმეებზეც კი უარს აცხადებდნენ. ჩვენ მარტო განათების ბოძები გვეხებაო, ეს საიდან მოიტანეს, არ ვიცი“, – ამბობს კურტანიძე.

რაც შეეხება ხელშეკრულების პირობების გაცნობას, კურტანიძე ასე გვპასუხობს: „ზოგადად კომპანიის დირექტორი ვალდებული არ არის სპეციალისტთან გაიაროს ხელშეკრულება“.

ახალგაზრდა იურისტთა ასოციაციის იურისტი ქეთი ბებიაშვილი განმარტავს, რომ კანონის თანახმად აღნიშნული თანამშრომლების გათავისუფლება ხელშეკრულების ვადის ამოწურვის მიზეზით არაკანონიერია, რადგან პირი, რომელიც ერთიდაიგივე სამსახურში ბოლო ხუთი წლის განმავლობაში მუშაობს, მას უვადო ხელშეკრულება უფორმდება.

„სამსახურის უფროსი ვალდებული იყო მუშისთვის ხელშეკრულება დეტალურად გაეცნო, ამას კანონი ითვალისწინებს“. – ამბობს ქეთი ბებიაშვილი.

„კეთილმოწყობის“ ყოფილი თანამშრომლები გეგმავენ, რომ სასამართლოს მიმართონ, მათი ადვოკატი „დემოკრატ მესხთა კავშირის“ იურისტი ეკა აბაშიძეა.

„მუშების პირად საქმეს ჯერ ბოლომდე არ გავცნობილვარ, ხელშეკრულებაში 40 საათიანი სამუშაო კვირაა მითითებული, თუმცა ელექტრიკოსების სამუშაო სპეციფიკურია. „კეთილმოწყობის“ ხელმძღვანელობამ აუცილებლად უნდა დაასაბუთოს, რომ ზეგანაკვეთურ შრომას უნაზღაურებდნენ, სხვა დეტალებზე კი მოგვიანებით შევძლებ საუბარს“, – გვითხრა აბაშიძემ.

„კეთილმოწყობის“ ყოფილ თანამშრომლებს შპს–ს ხელმძღვანელობასთან კიდევ ერთი პრეტენზია აქვთ, მათი განმარტებით, ქალაქის საახალწლო აქსესუარებით მორთვისთვის ანაზღაურება არ მიუღიათ.

„ქალაქს ყოველთვის ჩვენ გვართვევინებდნენ. შარშან 750–750 ლარი გადაგვიხადეს, მაგრამ წელს ანაზღაურების გარეშე ვიმუშავეთ“ – ამბობს ივანე დავიდოვი.

შეგახსენებთ, რომ შპს „კეთილმოწყობის“ სამსახურიდან 2018 წლის დეკემბერში ჯამში რვა თანამშრომელი გაათავისუფლეს, აქედან ექვსი მეეზოვეა, ორი კი ელექტრიკოსი.

[ავთო ინასარიძე, ახალციხე]