შპს კეთილმოწყობიდან გათავისუფლებულ ელექტრიკოსებს მორიგება შესთავაზეს

მას შემდეგ რაც ელექტრიკოსებმა ახალციხის რაიონულ სასამართლოში საქმე მოიგეს, კეთილმოწყობამ მოსამართლის გადაწყვეტილება სააპელაციოში გაასაჩივრა.

სააპელაციო სასამართლოში მხარეებს მორიგება შესთავაზეს. შპს კეთილმოწყობის დირექტორმა კობა კურტანიძემ მორიგებაზე თანხმობა განაცხადა.

„სასამართლომ ასე გადაწყვიტა, ჩვენ მის წინააღმდეგ არ წავალთ“, – ამბობს კურტანიძე.

ყოფილი ელექტრიკოსები ამბობენ, რომ მოლაპარაკება მხოლოდ მას შემდეგ შეიძლება, რაც კეთილმოწყობა პირობებს შესთავაზებს.

„ჯერ პირობები არ უთქვამთ. ჩვენ მარტო სამსახურში აღდგენაზე თანახმა არ ვართ. ეს პროცესზეც განვაცხადეთ. დღეს აღმადგინონ და ხვალ ისევ გამათავისუფლონ ესე არ გვინდა. გააჩნია რა პირობებს შემოგვთავაზებენ“, – ამბობს პავლე ათუნაშვილი.

მორიგი პროცესი სააპელაციო სასამართლოში 13 ნოემბერს ჩაინიშნა, ამ დღეს გაირკვევა დათანხმდებიან თუ არა ყოფილი თანამშრომლები შემოთავაზებას.

ელექტრიკოსები პავლე ათუნაშვილი და ივანე დავიდოვი, ახალციხის კეთილმოწყობის სამსახურიდან 2018 წლის 31 დეკემბერს ოთხ მეეზოვესთან ერთად გაათავისუფლეს. ოთხიდან სამმა სამსახურში აღდგენის და იძულებით განაცდური საათების ანაზღაურების მოთხოვნით სასამართლოს მიმართა.

გათავისუფლებული თანამშრომლები აცხადებდნენ, რომ "კეთილმოწყობის" სამსახურში მათ ანაზღაურების გარეშე დამატებითი სამუშაოს შესრულებას სთხოვდნენ.

[მარიამ ბარძიმაძე, ახალციხე]