მეეზოვის საქმეზე გადაწყვეტილება დღეს, 17 მაისს გამოცხადდება

„კეთილმოწყობის“ ყოფილი თანამშრომლის ინტერესებს ადვოკატი ეკა აბაშიძე იცავს. ადვოკატის მტკიცებით, მისი დაცვის ქვეშ მყოფი დაკისრებულ მოვალოებას კარგად ასრულებდა, გარდა ამისა, ლომიძე აღნიშნულ სამსახურში ათი წელი მუშაობდა, სამართლებრივად მისი გათავისუფლების მიზეზი ხელშეკრულების შეწყვეტა ვერ გახდებოდა.

საქმის არსებითი განხილვა ახალციხის რაიონულ სასამართლოში გუშინ, 16 მაისს გაიმართა. პროცესს მოპასუხის მხრიდან შპს-ს დირექტორი, კობა კურტანიძე კეთილმოწყობის სხვა თანამშრომლებთან ერთად ესწრებოდა.

კურტანიძის თქმით, მეეზოვე არაკეთილსინდისიერად ასრულებდა სამუშაოს, რის გამოც ხელშეკრულება აღარ გაუგრძელეს. გარდა ამისა, „კეთილმოწყობა“ 2017 წელს შეიქმნა და შესაბამისად დათო ლომიძე ორი წელია რაც თანამშრომელია, შესაბამისად მას უვადო ხელშეკრულება ვერ ექნებოდა.

ეკა აბაშიძის განმარტებით 2017 წელს შექმნილი შპს წინა „კეთილმოწყობის“ სამსახურის სამართალმემკვიდრეა: „ამონაწერში წერია, რომ მუნიციპალიტეტის მერიაში რეორგანიზაცია განხორციელდა და ამის შედეგად შეიქმნა ახალი. რაც იმას ნიშნავს, რომ დათო ლომიძეს უვადო შრომითი ხელშეკრულება აქვს“.

გარდა ამისა, ეკა აბაშძემ შპს „კეთილმოწყობისგან“ ხელფასის გაცემის წესი გამოითხოვა იმის დასადგენად, გვიდნენ თუ არა მეეზოვეები ქუჩებს ფართობების მიხედვით, ადვოკატის განმარტებით, შპს–ისგან მიწოდებულ შრომით ხელშეკრულებაში მხოლოდ ქუჩებია მითითებული და არ ჩანს, თუ რამდენი მეტრის დასუფთავება უწევდათ თანამშრომლებს.

მოპასუხე მხარემ დასაგველი ქუჩების ფართობის დამადასტურებელი დოკუმენტაცია ვერ წარმოადგინა. პროცესზე შპს „კეთილმოწყობის“ სპეციალისტმა, ირაკლი კურტანიძემ განაცხადა, რომ მეეზოვეები სიტყვიერად იყვნენ გაფრთხილებულები გზის რომელ მონაკვეთზე რამდენი მეტრი უნდა დაესუფთავებინათ.

ლომიძე, ახალციხის კეთილმოწყობის სამსახურიდან 2018 წლის 31 დეკემბერს ხუთ თანამშრომელთან ერთად გაათავისუფლეს. ყოფილი თანამშრომელი აცხადებს, რომ "კეთილმოწყობის" სამსახურში მათ ანაზღაურების გარეშე დამატებითი სამუშაოს შესრულებას სთხოვდნენ, კეთილმოწყობაში კი ირწმუნებიან, რომ ის ადამიანები, რომლებიც დაითხოვეს, მათზე დაკისრებულ მოვალეობას არ ასრულებდნენ.

დავით ლომიძის სასარჩელო მოთხოვნა განაცდურის ანაზღაურება და სამსახურში აღდგენაა.

[ავთო ინასარიძე, ახალციხე]