‘კეთილმოწყობას’ სასამართლო კიდევ ორმა თანამშრომელმა მოუგო

ახალციხის რაიონულმა სასამართლომ, ელექტრიკოსების პავლე ათუნაშვილის და ივანე დავიდოვის საქმეზე გადაწყვეტილება გუშინ, 29 მაისს გამოაცხადა.

მოსამართლე ნათია მერაბიშვილის განმარტებით, ათუნაშვილი და დავიდოვი შპს „კეთილმოწყობაში“ 2009 წლიდან მუშაობდნენ, ამიტომ მათი ხელშეკრულებები უვადო უნდა ყოფილიყო, შესაბამისად, სამსახურიდან გათავისუფლების მიზეზი ხელშეკრულების ვადის გასვლა ვერ იქნებოდა.

სასამართლო სხდომას მოპასუხე მხარე არ დასწრებია. „კეთილმოწყობის“ სამსახურში ამბობენ, რომ სასამართლო გადაწყვეტილების ჩაბარების შემდეგ შეთანხმდებიან გაასაჩივრებენ თუ არა სააპელაციო სასამართლოში.

ელექტრიკოსები პავლე ათუნაშვილი და ივანე დავიდოვი, ახალციხის კეთილმოწყობის სამსახურიდან 2018 წლის 31 დეკემბერს ოთხ მეეზოვესთან ერთად გაათავისუფლეს. ოთხიდან სამმა სამსახურში აღდგენის და იძულებით განაცდური საათების ანაზღაურების მოთხოვნით სასამართლოს მიმართა.

გათავისუფლებული თანამშრომლები აცხადებდნენ, რომ "კეთილმოწყობის" სამსახურში მათ ანაზღაურების გარეშე დამატებითი სამუშაოს შესრულებას სთხოვდნენ.

ელექტრიკოსების გარდა, „კეთილმოწყობას“ სასამართლო კიდევ ერთმა თანამშრომელმა დავით ლომიძემ მოუგო.

[ლუბა გიორგაძე, ახალციხე]