'პოლრობსონი'

ფეისბუქზე შეგხვედრიათ მეგობრების მიერ გაზიარებული ,,პოლრობსონის“ რეცეპტი? მე კი. ,,პოლრობსონი“ ნამცხვარს ჰქვია და ალბათ მე ნამცხვრის მოყვარული ბევრი მეგობარი მყავს. ამოვარდება ეს "პოლრობსონის“ კრემიანი ფოტო თითქმის ყოველ დღე ჩემს კედელზე და ვყლაპავ ნერწყვს.

იმდენს დაუწერია ფეისბუქზე, უამრავს და უამრავზე უამრავს, მეც იმათ რიგებში ჩავეწერები. დღეს ფეისბუქის სტატუსებზე ვიბაასოთ.

ახალი წელი რომ მოდის ფეისბუქსაც უხარია, უფრო სწორედ ფეისბუქ მომხმარებელსა და მაღაზია-კომპანიებს. საახალწლოდ იყიდეთ ფასდაკლებით მაცივარი. მე მეცინება ამ რეკლამაზე, ბოლო- ბოლო ვისაც აქამდე არ აქვს მაცივარი ის ამ სეზონზეც იოლად გავა. საჭმელ- სანოვაგეს აივანზე გამოაწყობს და მჭიდროდ დააფარებს თავზე, კატებმა ქვაბებს თავსახური არ მოხადონ და ყველაფერი არ ამოსლაქონ. ან კიდევ თუ აქამდე მაცივარი არ აქვს კაცს, მას არც იმდენი სურსათი ექნება მაცივარი გამოავსოს. ან ვისაც მაცივარი აქვს და სურთსათ- სანოვაგე, არც ფასდაკლებას ელოდება.

ჰოდა, შეგიძლიათ ფასდაკლებით საახალწლოდ შეიძინოთ ტელევიზორი. პროგრამები გვაქვს სასწაული. იყიდე ტელევიზორი და უყურე ,,იუმორინას“.

ზოგს თოვლის მოსვლა უნდა.

- ნეტა მოთოვოს, როგორ მიყვარს თოვლი - დაწერს ერთი, მერე ხუმარა მეგობარი გამოუჩნდება და მიუწერს -მოვა - და შენ ამ ,,მოვას“ კითხულობ ბურნუთას ხმით.

მოვირგეთ ფეისბუქი სწორედ ჩვენზეა ალბათ ნათქვამი.

ლამაზი კაბა ვიყიდე და მინდა ყველას ვუთხრა, ზოგს გული გაუხარო და ზოგსაც გაუხეთქო. ამისათვის, საკმარისია დავდგე ჩემი სახლის კედელთან საჩვენებელი თითით სენსორზე დავაწკაპო, მერე სწრაფადვე ავტვირთო ფოტო ფეისბუქში და დაველოდო გამოხმაურებებს.

ტყლუპ! პირველი კომენტარი: ვგიჟდები შენზე (მპუა)

ტყლუპ! ჩემი პასუხი: - მეც ვგიჟდები შენზე ( გაკოცეეე)

ტყლუპ! სხვა კომენტარი: ფანტასტიურად გამოიყურები!

ტყლუპ! ჩემი პასუხი: შენ რომ ამას მეტყვი თავად ფანტასტიურო!

და გრძელდება ასე კორიანტელი და სიყვარულის ფრქვევები.

მეტი პოზიტივი ერო! - რატომ აიტაცეს ეს ფრაზა და მოედო ყველას და ყველაფერს არ ვიცი. ან ვის მოაფიქრდა ნეტა თავიდან? ამ ფრაზის ქვეშაა ხოლმე სასწაული კომენტარები:

- რა პოზიტივი დავინახო, შენ ეტყობა საქართველოში არ ცხოვრობ.

- პურის ფული რომ არ გაქვს რა გეპოზიტივება!

- კომპიუტერის ყიდვას და ინტერნეტის ჩართვას პური გეყიდათ ქალბატონო!

- პოზიტივი კი არა ჯანდაბა!

"პოლ რობსონი“ მეც ნამცხვრის სახელი მეგონა თქვენსავით აქამდე, თურმე ამერიკელი მომღერალი, მსახიობი, სამოქალაქო აქტივისტი და ადვოკატი ყოფილა.

ჰოდა, ფეისბუქშიც, სრული ,,პოლრობსონობა“ გვაქვს.

[მატასი]