ადვოკატი ენმ–ს წევრების მიმართ საქმის შეწყვეტას ითხოვს

ამის შესახებ იაშვილმა ახალქალაქის რაიონულ სასამართლოში საქმის განხილვისას განაცხადა.

„ყველაზე მსუბუქი მუხლით ასამართლებენ იმ ხუთ პირს, რომლებიც „ნაციონალებთან“ ცეცხლსასროლი იარაღებით შეიჭრნენ და ჭრილობები მიაყენეს იქ მყოფებს. ამ ადამიანებს, ჭრილობების კვალი შესაძლოა მთელი ცხოვრება დარჩეთ, დღემდე ჩვენი ბიჭები დაზარალებულად არ არიან ცნობილი, არავითარ მასალებს არ გავცნობენ ამ საქმეში“, – ამბობს იაშვილი და ამატებს, რომ მას სასამართლოს ობიექტურობის იმედი არ აქვს – „რეალურად ახლა დაზარალებულებს ასამართლებენ. ვითხოვ მათ უპირობოდ, ყველანაირი ჯარიმის გარეშე გათავისუფლებას“.

დღეს, 26 ნოემბერს, ახალქალაქის რაიონულ სასამართლოში ენმ–ს წევრების აშოტ რაისიანისა და მიხეილ აგაბაბიანის მიერ სალომე ზურაბიშვილის პლაკატების ჩამოხევის საქმეზე მსჯელობენ. პროცესს ენმ–ს ერთ–ერთი ლიდერი გიორგი ბარამიძე ესწრება.

ახალქალაქში „ერთიანი ნაციონალური მოძრაობის“ ოფისის ხელმძღვანელს აშოტ რაისიანსა და ამავე პარტიის წევრს მიხეილ რაისიანს გამოძიება ბენზინ გამასამრთ სადგურებზე სალომე ზურაბიშვილის პლაკატების ჩამოხევისა და სიტყვიერი შეურაცხყოფისთვის ედავება. მომხდარზე ძიება წვრილმანი ხულიგნობის მუხლით მიმდინარეობს.

შეგახსენებთ, რომ აშოტ რაისიანი და მიხეილ აგაბაბიანი 30 ოქტომბერს, „ნაციონალური მოძრაობის“ ოფისთან, „ქართული ოცნების“ წევრებთან დაპირისპირების შედეგად დაშავდნენ. დაპირისპირება კი წინა ღამით, ახალქალაქი–ნინოწმინდის მაჟორიტარი დეპუტატის ენზელ მკოიანის ძმის მარტუნ მკოიანის ბენზინ გასამართ სადგურებზე საპრეზიდენტო კანდიდატის სალომე ზურაბიშვილის პლაკატების ჩამოხევას მოჰყვა.

[sknews.ge]