საცხობში ორი თვის წინ დაპირებული ფილტრები კიდევ არ შეუცვლიათ

რუსთავლის ქუჩის მცხოვრებლებისთვის, აქ არსებული პურის საცხობის საკვამური ისევ პრობლემაა, კვამლი კორპუსს ედება და მის გვერდით საბავშვო სკვერს აბინძურებს: „ზაფხულია და ნორმალურად ფანჯრებს ვერც ვაღებთ, როგორც კი პურის გამოსაცხობად აინთება ფურნე გარშემო ყველაფერი კვამლში ეხვევა. დაგვპირდა მეპტრონე ფილტრებს გავაკეთებო, მაგრამ ჯერ არაფერი შეცვლილა“, – ამბობენ ადგილობრივები.

პურის საცხობის მეპატრონე დავით ბალიაშვილი ორი თვის წინ აცხადებდა, რომ ახალი ფილტრები შეკვეთილი ჰქონდა და უახლოეს დღეებში დაამონტაჟებდა. ახლა კი ამბობს, რომ ფილტრების დამონტაჟება გადაიფიქრა: „გაზი შეგვყავს და სექტემბრიდან უკვე ფურნე გაზზე იმუშავებს, საკვამურისთვის ფილტრების გაკეთება აუცილებელი აღარ იქნება, ამიტომაც არ დავამონტაჟეთ“.

შეგახსენებთ, რომ ადგილობრივები საკვამურიდან ამოსული კვამლის გამო ჯერ კიდევ ორი თვის წინ ჩიოდნენ და ამბობდნენ, რომ კვამლი სახლებში შედიოდა და საბავშვო სკვერს აბინძურებდა. ამის გამო, ადგილობრივები მერიაში განცხადების შეტანასაც აპირებდნენ, თუმცა თვითმმართველობისთვის აღარ მიუმართავთ.

[ლუბა გიორგაძე, ახალციხე]