რა დახარჯა ახალციხის საკრებულომ ოფიციალური სადილებისთვის

ახალციხის მუნიციპალიტეტის საკრებულომ წარმომადგენლობითი ხარჯებისთვის 2018 წელს 2 850 ლარი დახარჯა, გასულ წელს კი – 3 604.

მიმდინარე წელს საკრებულომ სულ რვა ხელშეკრულება გააფორმა. აქედან ერთი, 1 673 ლარზე რესტორან „რაბათთან“ სტუმრების მიღებისა და ოფიციალური სადილისთვის, ასევე, ერთი ხელშეკრულება გაფორმდა სადილისთვის ინდივიდუალურ მეწარმე ხათუნა გაბრიელიანთან 901 ლარზე, ორი ხელშეკრულება დაიდო, ჯამში 180 ლარზე, ინდივიდუალურ მეწარმე კობა თათეშვილთან. დარჩენილი 95 ლარი კი საკრებულომ წყლისა და სუვენირების შესაძენად გადაიხადა.

გასულ წელს ახალციხის საკრებულომ წარმომადგენლობითი ხარჯების გადასარიცხად 12 ხელშეკრულება გააფორმა. აქედან სასტუმრო „რიოს“ 1 600 ლარი, ხოლო რესტორან „რაბათს“ 1 254 ლარი გადაუხადა, 461 ლარი წყლის შესაძენად დახარჯა, დანარჩენი თანხა კი სუვენირებსა და სხვა ხარჯებზე გაწერა.

[თორნიკე ზაზაძე, ახალციხე]