ორ წელიწადში ნინოწმინდაში სტუმრების გამასპინძლებაში 56 000 ლარი დახარჯეს

სახელმწიფო აუდიტის დასკვნაში ვკითხულობთ, რომ ნინოწმინდის მუნიციპალიტეტის გამგებლის და საკრებულოს თავმჯდომარის მიერ გაცემული ბრძანების საფუძველზე ორი წლის განმავლობაში 56 ხელშეკრულება გაფორმდა. 2015 წელს 24 ხელშეკრულება (ღირებულებით 30 500 ლარი), ხოლო 2016 წელს 32 ხელშეკრულება ( ღირებულებით 25 500 ლარი).

„კვების ობიექტის მომსახურებაზე გაწეული ხარჯებიდან, ხშირ შემთხვევაში არ არის აღნიშნული ჩასატარებელი ღონისძიების დასახელება, სტუმრობის მიზანი, სტუმრებისა და მასპინძლების ოდენობა და სხვა მონაცემები. წარმომადგენლობითი ხარჯებიდან თანხის გამოყოფის შესახებ ბრძანებებში, 15 შემთხვევაში (სულ 12.4 ათასი ლარი) ხარჯის გაწევის მიზეზად მითითებულია „მაღალი რანგის სტუმრების მისაღებად“, ხოლო 25 შემთხვევაში თანხები გამოყოფილია სხვადასხვა სამინისტროს წარმომადგენლების კვებით მასპინძლობისათვის, კონკრეტული პირებისა და მათი რაოდენობის მითითების გარეშე“, – წერია აუდიტის დასკვნაში.

აუდიტის დასკვნის მიხედვით, აღნიშნულიდან გამომდინარე, შეუძლებელია დადგინდეს მუნიციპალიტეტის მიერ ჩატარებული ღონისძიებების დასახელება, სტუმრობის მიზანი, სტუმართა და მასპინძელთა ოდენობა და სხვა მონაცემები. შესაბამისად, 2015-2016 წლებში მუნიციპალიტეტის (შესაბამისი პასუხისმგებელი პირების) მიერ გაწეული 56 000 ლარის წარმომადგენლობითი ხარჯის მიზანშეწონილობა დოკუმენტურად არ დასტურდება.

აუდიტის სამსახური ნინოწმინდის მუნიციპალიტეტის ხელმძღვანელობას აძლევს რეკომენდაციას, რომ საკრებულომ შეიმუშაოს შესაბამისი წესი, რომელიც უზრუნველყოფს წარმომადგენლობითი ხარჯების გაწევას რაციონალურად, ეკონომიურად და გამჭვირვალედ. აღნიშნული წესით უნდა განისაზღვროს სტუმრების მიღების ფორმა, მიზანი და გამასპინძლების ეტიკეტი, რომლის მიხედვით მოხდება ადგილობრივი ბიუჯეტიდან წარმომადგენლობითი ხარჯის გაწევა.

„ამასთანავე, არსებული ფინანსური რესურსის განაწილების პროცესში ხარჯების დაგეგმვისას, გამგეობის შესაბამისმა სამსახურებმა გაითვალისწინონ ის პრიორიტეტები, რომლებიც მოსახლეობის სოციალურ-ეკონომიკური მდგომარეობის გასაუმჯობესებლად იქნება მიმართული“, – ვკითხულობთ აუდიტის დასკვნაში.

[თინათინ ზაზაძე, ნინოწმინდა]