არჩევნების მეორე ტურზე სამცხე–ჯავახეთის ოლქებში 12 საჩივარი დაიწერა

არჩევნების დღეს, ყველაზე მეტი, 10 საჩივარი N40–ე ახალქალაქის საარჩევნო ოლქში დაიწერა, რომლის უმეტესობა პროცედურულ დარღვევებს ეხებოდა. როდის განიხილავს ოლქი საჩივრებს ჯერ უცნობია.

ასევე არ არის სხდომის დრო ჩანიშნული N37 ახალციხის საარჩევნო ოლქშიც, სადაც ამ დრომდე [12:00 საათი] ერთი საჩივარია შესული. ოლქის თავმჯდომარის თეა გავაშელის განმარტებით, საჩივარი პროცედურულ დარღვევებს ეხება.

მისი თქმით,ოლქში არ შესულა თუმცა, რამდენიმე საჩივარი დაიწერა უბნებზე: „ამ შემთხვევებშიც პროცედურული დარღვევები იყო, ადგილზე განიხილიეს და აღმოფხვრეს“.

არჩევნების მეორე ტურზე, ერთი საჩივარი დაიწერა N36 ბორჯომის საარჩევნო ოლქში, რომლის ავტორის „სამართლიანი არჩევნებია“.

საჩივარი კენჭისყრის ფარულობის დარღვევას ეხება –„კერძოდ, კაბინიდან გამოსულ ამომრჩეველს ოცნების წარმომადგენელი ღიად საჯაროდ უმოწმებდა, თუ რომელი კანდიდატი შემოხაზა ბიულეტენში“,–ნათქვამია საჩივარში.

არც კენჭისყრის დროს და არც საარჩევნო უბნების დახურვის შემდეგ, საჩივარი არ დაწერილა ნინოწმინდის, ასპინძის და ადიგენის საარჩევნო ოლქებში.

შეგახსენებთ, რომ საპრეზიდენტო არჩევნების მეორე ტური გუშინ, 28 ნოემებერს გაიმართა. ცესკოს წინასწარი მონაცემებით „ქართული ოცნების“ მიერ მხარდაჭერილი დამოუკიდებელი კანდიდატი სალომე ზურაბიშვილი იმარჯვებს.

[ლუბა გიორგაძე, ახალციხე]