ახალციხის მერია საახალწლო ღონისძიებისთვის, დაახლოებით, 19 000 ლარს დახარჯავს

ახალციხის მერიის მიერ გამოცხადებულ ტენდერში წინადადებების მიღება სამი დეკემბრიდან დაიწყება.

სატენდერო დოკუმენტების მიხედვით, მიმწოდებელმა უნდა დაამზადოს ოთხი ცალი თოკებით გასაჭიმი ბანერი, რომელზეც იქნება წარწერა „გილოცავთ ახალ 2019 წელს“, ასევე, უნდა მოძებნოს გამოცდილი წამყვანი ღონისძიებისთვის, დაამონტაჟოს საახალწლო განათებები და ბანერები ახალციხის 13 სკვერში, ვალესა და სოფლებში, შეიძინოს სხვადასხვა საახალწლო ფიგურა, რომლებსაც დაამონტაჟებს ქალაქის ცენტრალურ პარკში, აქვე მოაწყოს ნაძვის ხე და დაამზადოს 300 ცალი მისალოცი ბარათი.

28–31 დეკემბერს თოვლის პაპასა და სანტა კლაუსის ფორმაში ჩაცმული ექვსი მსახიობი ახალციხის სოფლებს შემოივლიან, ადგილობრივებს ახალ წელს მიულოცავენ და პატარებს ტკბილეულს დაურიგებენ.

31 დეკემბერს 16:00–საათიდან 19:00–საათამდე ქალაქის ცენტრში კონცერტი გაიმართება, სადაც ბენდი და ასევე, სოლო მომღერლები იმღერებენ. ტენდერში გამარჯვებულმა მათთვის გახმოვანების აპარატურა უნდა იქირაოს.

2018 წლის საახალწლო ღონისძიებებისათვის ადგილობრივი ბიუჯეტიდან 45 000–მდე ლარი დაიხარჯა.

[მარიამ ბარძიმაძე, ახალციხე]