სამცხე–ჯავახეთის საკრებულოებში ბიუჯეტების განხილვა იწყება

სამცხე–ჯავახეთის ექვსი მუნიციპალიტეტიდან ოთხში – ახალციხეში, ასპინძაში, ბორჯომსა და ნინოწმინდაში ბიუჯეტების პროექტების განხილვა 22 ნოემბერს გაიმართება. ახალციხის საკრებულოს კომისიებში კი ბიუჯეტის შესახებ დღეს, 20 ნოემბერს იმსჯელეს. „საჯარო განხილვის შემდეგ შევიტანთ პროექტში შენიშვნებს და გადავუგზავნით მერიას“, – ამბობს ახალციხის საკრებულოს თავმჯდომარე გელა ნოზაძე და ამატებს, რომ მუნიციპალიტეტის ბიუჯეტი პროექტით 15 900 000 ლარია.

უკვე საკრებულოშია ასპინძის ბიუჯეტის პროექტიც. „პროექტი 4 300 000 ლარს შეადგენს და ჯერ შენიშვნები არ გვაქვს“ – გვითხრა ასპინძის საკრებულოს თავმჯდომარემ მამუკა მელიქიძემ.

18 300 000 ლარია ბორჯომის 2019 წლის ბიუჯეტი. „რამდენიმე ააიპ–ს გაზრდილი თანხა აქვს, რის საფუძველზე და რა მიზნით მოხდა ეს, ამაზე საკრებულოში 22 ნოემბერს ვიმსჯელებთ“, - აცხადებს ბორჯომის საკრებულოს თავმჯდომარე გიორგი გოგიჩაიშვილი.

მერიის შეთავაზებული ბიუჯეტის განსახილველად ემზადებიან ნინოწმინდის საკრებულოშიც, პროექტით ბიუჯეტი 5 600 000 ლარია. „22 ნოემბერს განვიხილავთ და მერიას იმ დღესვე დავუბრუნებთ“, – გვითხრა ნინოწმინდის საკრებულოს თავმჯდომარემ სუმბატ კიურეღიანმა.

როდის განიხილავენ მუნიციპალიტეტის მთავარ ფინანსურ დოკუმენტს ახალქალაქის საკრებულოში ჯერ განსაზღვრული არ აქვთ. აქ ბიუჯეტის შემადგენლობა 9 080 000 ლარია.

რაც შეეხება ადიგენს, მუნიციპალიტეტის მერიაში აცხადებენ, რომ პროექტი საკრებულოს უკვე გადაეგზავნა: "ნამდვილად არ ვიცი ბიუჯეტის პროექტის თანხა", – გვითხრა ადიგენის მერმა ზაქარია ენდელაძემ. ადიგენის საკრებულოს თავმჯდომარემ იმედა მღებრიშვილმა კი "სამხრეთის კარიბჭეს" სატელეფონო ზარბს არ უპასუხა.

შენიშვნებით ჩასწორებულ პროექტს მერიები საკრებულოებს 25 დეკემბრამდე გადაუგზავნიან. საკრებულოები კი დოკუმენტს 28 დეკემბრამდე დაამტკიცებენ.

[ავთო ინასარიძე, ახალციხე]