სამცხე–ჯავახეთში ბიუჯეტების განხილვა გვიანდება

2018 წლის ბიუჯეტის პროექტები ერთ კვირაზე მეტია საკრებულოებშია, თუმცა, მომავალი წლის მთავარი ფინანსური დოკუმენტის საჯარო განხილვები ამ დრომდე არ დაწყებულა. დოკუმენტის განხილვა დღეს, 22 ნოემბერს, მხოლოდ ბორჯომის მუნიციპალიტეტის საკრებულომ დაიწყო.

ბორჯომში სხდომა გუშინ, 21 ნოემბერს დაინიშნა. დღეს ბიუჯეტის განხილვას მხოლოს საკრებულოს უმრავლესობა, ოპოზიციური პარტიების წევრი 15 დეპუტატი ესწრებოდა, უმცირესობა, „ქართული ოცნების“ 13 დეპუტატი, სხდომას არ დაესწრო.

ოპოზიციური პარტების დეპუტატებმა ბიუჯეტი განიხილეს და განაცხადეს, რომ მომდევნო დღეებშიც გაგრძელდება განხილვა, „ქართული ოცნების“ დეპუტატებთან ერთად.

რეგიონის დანარჩენ მუნიციპალიტეტებში, ბიუჯეტის პროექტების განხილვის დაგვიანებას წარმომადგენლობითი ორგანოების დაკომპლექტების პროცესით ხსნიან.

„ჯერ პირველ სხდომას ველოდებოდით, საკრებულოს უფლებამოსილება ხომ უნდა მიეღო. ახლა საკრებულოს აპარატი ტექნიკურ დეტალებს ათანხმებს და მალე ჩანიშნავთ სხდომას“, – გვიხსნის ადიგენის მუნიციპალიტეტის საკრებულოს თავმჯდომარე იმედა მღებრიშვილი.

ადიგენის მუნიციპალიტეტის 2018 წლის ბიუჯეტის პროექტი 4 მილიონ 700 ლარით განისაზღვრა.

ადიგენის მსგავასად, ჯერ ისევ არ არის ცნობილი, როდის გაიმართება საჯარო განხილვა ახალციხის მუნიციპალიტეტის საკრებულოში. ახალციხის საკრებულო რეგიონის დანარჩენ საკრებულებამდე ერთი კვირით ადრე, 14 ნოემბერს დაკომპლექტდა.

საკრებულოს თავმჯდომარე განხილვის დაგვიანებას კომისიების ჩამოუყალიბებლობით ხსნის: „ჯერ კომისიებში ვერ განვიხილეთ, იმიტომ, რომ არ დაკომპლექტებულა, მხოლოდ თავმჯდომარეები ჰყავს. ვადებში აუცილებლად ჩავეტევით“.

ახალციხის გაერთიანებული მუნიციპალიტეტის ბიუჯეტის პროექტი, დაახლოებით 13 მილიონი ლარითაა განსაზღვრული.

27 ნოემბერს გეგმავს ბიუჯეტის განხილვას ასპინძის მუნიციპალიტეტის საკრებულოს თავმჯდომარე მამუკა მელიქიძე: „25–ია ბოლო ვადა, თუმცა, შაბათი უწევს და ვფიქრობთ, რომ ყველაფერს ორშაბათს მოვასწრებთ“.

კოლეგების მსგავსად, მამუკა მელიქიძეც, ბიუჯეტის პროექტის განხილვის გაჭიანურებას, საკრებულოს გვიან დაკომპლექტებით ხსნის.
ასპინძის ბიუჯეტი, პროექტის მიხედვით, 4 მილიონამდე ლარით განისაზღვრება.

განსხვავებით ასპინძისგან, ნინოწმინდის საკრებულოში ვერ აკონკრეტებენ, როდის დაიწყება მომავალი წლის მთავარი ფინანსური დოკუმენტის განხილვა. ნინოწმინდის ბიუჯეტი, პროექტის მიხედვით, 5 მილიონს შეადგენს.

თარიღი ჯერ არც ახალქალაქში ჩაუნიშნავთ. ახალქალაქში, მომავალი წლის ბიუჯეტი პროექტი, 17 მილიონამდე ლარით განისაზღვრება.

შეგახსენებთ, რომ 2017 წლის თვითმმართველობის არჩევნების შემდეგ, სამცხე–ჯავახეთში ახალციხის საკრებულო 14 ნოემბერს, დანარჩენი ხუთი მუნიციპალიტეტის საკრებულო კი 20 ნოემბერს დაკომპლექტდა. საკრებულოებში ბიუჯეტის პროექტები მერიიდან 15 ნოემბერს გადაიგზავნა.

[ლუბა გიორგაძე, სამცხე–ჯავახეთი]